ఇరాన్​ ఉగ్రవాదాన్ని పెంచి పోషిస్తోంది : పాంపియో

భారత్​లో మూడు రోజుల పర్యటనలో ఉన్న అమెరికా విదేశాంగ మంత్రి మైక్ పాంపియో... పలువురు కీలక నేతలతో భేటీ అయ్యారు. ఈ ఉదయం ప్రధాని మోదీతో సమావేశం అనంతరం విదేశాంగ మంత్రి జై శంకర్​తో పాటు జాతీయ భద్రతా సలహాదారు అజితో డోభాల్​తో భేటీ అయ్యారు. ఈ సందర్భంగా ఇరాన్​ ఉగ్రవాదాన్ని పెంచి పోషిస్తోందని ప్రకటించారు.

అమెరికా విదేశాంగ మంత్రి మైక్​ పాంపియో.. భారత విదేశాంగ మంత్రి జై శంకర్​తో భేటీ అయ్యారు. ఉగ్రవాదంపై ఇరుదేశాల నేతలు ప్రధానంగా చర్చించారు. ఇరాన్​ ఉగ్రవాదాన్ని పెంచి పోషిస్తోందని మైక్ పాంపియో ఆగ్రహం వ్యక్తం చేశారు. ప్రపంచ నలుమూలల నుంచి ఉగ్రవాద ముప్పుతో భారత ప్రజలు కష్టాలు పడుతున్నారన్నారు. ఈ విషయంలో భారత్​కు అన్ని విధాల సహకరిస్తామని తెలిపారు. ఇరు దేశాల మధ్య వాణిజ్య సంబంధాలు బలోపేతమయ్యే దిశగా కీలక ఒప్పందాలు చేసుకున్నారు. హెచ్​-1బీ వీసాలు, ఇరాన్​ ముడిచమురుపై అగ్రరాజ్యం ఆంక్షలతో భారత్​లో నెలకొన్న పరిస్థితులు, తదితర అంశాలపై ఇరుదేశాల విదేశాంగ మంత్రులు చర్చించారు.

భారత్​లో మూడురోజుల పర్యటనలో భాగంగా మంగళవారం రాత్రి దిల్లీ చేరుకున్నారు పాంపియో. ఈ ఉదయమే మోదీతో సమావేశమయ్యారు. ఇరుదేశాల మధ్య పలు కీలక అంశాలతో పాటు ఈ వారాంతంలో జరగనున్న జీ-20 సదస్సుపై ఇరువురు నేతలు చర్చించారు. అనంతరం భారత జాతీయ భద్రతా సలహాదారు అజిత్ డోభాల్​తో చర్చలు జరిపారు పాంపియో. భారత్​లో పాంపియో పర్యటన రేపటితో ముగియనుంది.

ఇదీ చూడండి : ప్రధాని మోదీతో మైక్​ పాంపియో భేటీ