డిగ్రీ ధ్రువపత్రాలపై హోలోగ్రామ్​ ముద్రణ

విద్యార్థుల డిగ్రీ పట్టాలపై ఇక నుంచి హోలోగ్రామ్​, క్యూఆర్​ కోడ్​లను ముద్రించాలని యూనివర్సిటీ గ్రాంట్స్​ కమిషన్​(యూజీసీ) నిర్ణయం తీసుకుంది. ఈ మేరకు చర్యలు తీసుకోవాలని అన్ని ఉన్నత విద్యాసంస్థలకు ఆదేశాలు జారీ చేసింది యూజీసీ.

డిగ్రీ నకిలీ పట్టాలను అరికట్టేందుకు చర్యలకు ఉపక్రమించింది యూనివర్సిటీ గ్రాంట్స్​ కమిషన్​(యూజీసీ). ఇకపై విద్యార్థుల ధ్రువపత్రాలపై హోలోగ్రామ్​, క్యూఆర్​ కోడ్​లను ముద్రించాలని అన్ని ఉన్నత విద్యాసంస్థలకు ఆదేశాలు జారీ చేసింది. ఈ విధానంతో సముచిత ధ్రువీకరణతో పాటు నకిలీలను అరికట్టవచ్చని పేర్కొంది.

"విద్యార్థుల మార్కుల జాబితాల్లో భద్రతా అంశాలపై దృష్టి పెట్టాలి. ధ్రువీకరణ, నకిలీ పత్రాలను అరికట్టేందుకు ఇవి ఉపయోగపడాలి. డిగ్రీ పట్టాలపై విద్యార్థి ఫొటో, విద్యాసంస్థ హోలోగ్రామ్​, క్యూఆర్​ కోడ్​ ముద్రణ తప్పనిసరి చేయాలి. ఈ సమాచారంతో విద్యార్థి పూర్తి వివరాలు తెలిసేలా రూపొందించాలి. "

-యూజీసీ కార్యదర్శి

విద్యార్థులకు అందజేసే పత్రాల్లో విద్యాసంస్థ పేరు పక్కన అవి ఉన్న ప్రదేశాన్ని కూడా ముద్రించాలని సూచించింది యూజీసీ. అలాగే రెగ్యులర్​, పార్ట్​-టైమ్​, దూరవిద్య లాంటి వివరాలనూ పొందుపరచి విద్యార్థులకు జీవిత కాలం ఉపయోగపడేలా చేయాలని పేర్కొన్నారు.

ఇదీ చూడండి: 'గణాంక వ్యవస్థలో మార్పులు అవసరం'