పెళ్లికి ముందు వధువు, వరుడు పారిపోయే సంఘటనలు సినిమాల్లో అనేకం చూసుంటాం. పెళ్లి పీటలపై నుంచి వధువును ఎత్తుకెళ్లడం ఓ స్టోరీ. పారిపోయిన ప్రేమికులను తల్లిదండ్రులు తిరిగి తీసుకురావడం, వేరేవారికిచ్చి వివాహం చేయడం మరో తరహా కథ.
ఇలాంటి కథలకు భిన్నంగా వివాహమై అత్తారింటికి వెళ్తున్న నవ వధువును గుర్తు తెలియని వ్యక్తులు ఎత్తుకెళ్లారు. రాజస్థాన్లోని ఉదయ్పుర్లో జరిగిందీ సంఘటన. అప్పుడే పెళ్లి పూర్తయిన కొత్త జంట స్వగృహానికి బయలుదేరింది. మార్గమధ్యంలో వచ్చిన రైల్వే లెవల్ క్రాసింగ్ వద్ద కారు ఆగింది. మరో కారు వచ్చి పెళ్లి కారు పక్కనే ఆగింది. బైక్పై వచ్చిన ఇద్దరు అగంతుకులు కారు పైకి లంఘించారు. వరుడిని బయటకు లాగి కొట్టి పడేశారు. నవ వధువును కార్లో ఎత్తుకెళ్లిపోయారు.