ఉపవాస దీక్షలోనే దేశం కోసం ప్రాణాలర్పించిన సైనికులు

దేశం కోసం సైనికుల త్యాగాలు మరవలేనివి. ప్రస్తుతం రంజాన్​ మాసం సందర్భంగా సైన్యంలోని ముస్లింలు ఓ వైపు ఉపవాసం చేస్తూ.. మరోవైపు దేశం కోసం పోరాడుతున్నారు.  అలాంటి వారిని ఇస్లామిక్​గా చెప్పుకునే ఉగ్రవాదులు పొట్టున పెట్టుకున్న ఘటన శ్రీనగర్​లోని పాండచ్​ ప్రాంతంలో జరిగింది. ఉపవాస దీక్షలోనే దేశం కోసం ప్రాణాలర్పించారు ఇద్దరు జవాన్లు.

రంజాన్​ మాసంలో ముస్లింలు ఉపవాసం పాటిస్తారు. ఈ సమయంలో పచ్చి మంచి నీళ్లు కూడా ముట్టుకోకుండా పవిత్రంగా ఉంటారు. సైన్యంలోని ముస్లింలు తమ విధులు నిర్వర్తిస్తూనే.. ఉపవాసం కొనసాగిస్తున్నారు. అయితే.. ఇస్లామిక్​గా చెప్పుకునే ఉగ్రవాదులు బుధవారం సాయంత్రం జమ్ముకశ్మీర్​లో ఇఫ్తార్​ కోసం బ్రెడ్​ కొనుగోలు చేస్తున్న ఇద్దరు ముస్లిం జవాన్లపై కాల్పులు జరిపి పొట్టనపెట్టుకున్నారు. ఉపవాస దీక్షలోనే దేశం కోసం ప్రాణాలర్పించారు జవాన్లు.

ఇదీ జరిగింది..

శ్రీనగర్​లోని పాండచ్​ ప్రాంతంలో బీఎస్​ఎఫ్​ 37వ బెటాలియన్​కు చెందిన జియా ఉల్​ హక్​, రానా మొండల్​ విధులు నిర్వర్తిస్తున్నారు. ఉపవాసం ముగించుకుని ఇఫ్తార్​ కోసం బ్రెడ్​ కొనేందుకు బుధవారం(మే20న) సాయంత్రం మార్కెట్​కు వెళ్లారు. అప్పటికే మార్కెట్​ రద్దీగా ఉంది. ఆ సమయంలో ద్విచక్రవాహనంపై వచ్చిన ముష్కరులు హక్​, మొండాల్​పై కాల్పులు జరిపారు. అనంతరం అక్కడి నుంచి పరారయ్యారు. తీవ్రంగా గాయపడిన వారిని ఆస్పత్రికి తరలిస్తుండగా మార్గమధ్యలో ఒకరు, చికిత్స పొందుతూ మరొకరు మృతి చెందారు.

పాకిస్థాన్​ ఆధారిత లష్కరే తోయిబా అనుబంధ సంస్థ ది రెసిస్టన్స్​ ఫ్రండ్​ (టీఆర్​ఎఫ్​).. ఈ దాడికి బాధ్యత వహించింది.

ఇఫ్తార్​కు కొద్ది సమయానికి ముందు ఈ దాడి జరిగిందని, రోజంతా ఉపవాసం ఉన్న వారు ఒక్క చుక్క నీరు కూడా తీసుకోకుండా ఈ లోకాన్ని విడిచారని ఆవేదన వ్యక్తం చేశారు 37 బెటాలియన్​లోని సిబ్బంది.

"ఇలాంటి ఇఫ్తార్​ ఎప్పుడూ జరగలేదు. బ్రెడ్​ కొనుగోలు చేస్తున్నవారిపై దాడికి పాల్పడ్డారు. హక్​, మొండల్​లు బంగాల్​లోని ముర్షిదాబాద్​కు చెందినవారు. అంపాన్​ తుపాన్​తో ఆ రాష్ట్రంలో విమానాశ్రయాలు మూసివేయటం వల్ల జవాన్ల పార్థీవదేహాలను స్వగ్రామలకు తరలించలేకపోయాం."

– అధికారులు.

హక్​ 2009లో బీఎస్​ఎఫ్​లో చేరాడు. అతనికి తల్లిదండ్రులు, భార్య, నలుగురు కుమార్తెలు ఉన్నారు. అందులో నాలుగేళ్ల జెష్లిన్​ జియుల్​కు చెవులు వినపడవు, మరో కూతురుకు ఆరు నెలల వయసు ఉంటుంది. మొండల్​కు తల్లిదండ్రులు, భార్య, ఆరు నెలల కుమార్తె ఉంది.