సైన్యం కళ్లుగప్పేందుకు ఉగ్రవాదుల నయా ట్రెండ్​

జమ్ముకశ్మీర్​లోని ఉగ్రవాదులు.. సైన్యం కళ్లుగప్పి తప్పించుకోవడానికి కొత్త పద్ధతులు వెతుకుతున్నారు. సెప్టిక్ ట్యాంకు​లు, భూగర్భ బంకర్లను వినియోగిస్తున్నారు. అంతేకాదు.. కాలానుగుణంగా ప్రవేహించే నదుల మధ్య ఇనుప పెట్టెల్లో నక్కి ఉంటున్నారు. ప్రధానంగా షోపియన్​, అనంత్​నాగ్​ జిల్లాల్లో ఇవి బయటపడుతున్నాయని, అలాంటి వాటిని గుర్తించేందుకు డ్రోన్లను రంగంలోకి దింపుతున్నట్లు సైనికాధికారులు తెలిపారు.

జమ్ముకశ్మీర్​లో ఒకప్పుడు ఉగ్రవాదులు జనావాసాల్లోనే ఉంటూ హింసాత్మక ఘటనలకు పాల్పడేవారు. కానీ, కొద్ది రోజులుగా ఉగ్రమూకలపై సైన్యం ఉక్కుపాదం మోపుతున్న క్రమంలో అది అత్యంత ప్రమాదకరంగా మారింది. అందుకే సైన్యం కంటికి కనబడకుండా ఉంటూ దాడులకు పాల్పడేందుకు కొత్త కొత్త పద్ధతులను అవలంబిస్తున్నారు ముష్కరులు. అందుకోసం శౌచాలయాల సెప్టిక్​ ట్యాంకులు, భూగర్భ బంకర్లు, నకలీ గుంతలు, కాలానుగుణంగా ప్రవహించే నదుల కింద ఇనుప పెట్టెలను ఏర్పాటు చేసుకుని ఆశ్రయం పొందటం ఇప్పుడు నయా ట్రెండ్​గా మారింది.

ఇటీవల జరిగిన ఎన్​కౌంటర్లలో పలువురు కీలక ఉగ్రనాయకులు మరణించటం, భారీగా నష్టం ఏర్పడుతున్న క్రమంలో ముష్కరులు, వారి సన్నిహితులు ప్రత్యామ్నాయాలవైపు చూస్తున్నట్లు చెబుతున్నారు సైనికాధికారులు.

" భూగర్భ బంకర్లు, నకలీ గుంతలు వంటివి కొత్తేమీ కాదు. కానీ ప్రస్తుతం దక్షిణ కశ్మీర్​లో ఎక్కువగా కనిపిస్తున్నాయి. ఓ కేసులో టాయిలెట్​ సెప్టిక్​ ట్యాంకు లోపల ఓ ఉగ్రవాది దాగి ఉండటం గుర్తించాం. ఈ ఏడాది మార్చిలో అనంత్​నాగ్​ జిల్లాలోని వత్రిగామ్​ ప్రాంతంలో రహస్య బంకర్​ను గుర్తించాం. మా దృష్టి మరల్చేందుకు టాయిలెట్​ సీటుపై మానవ మలమూత్రాలు ఉన్నప్పటికీ.. విరిగిన పలకలు, కొత్త తెల్ల సిమెంట్​ అక్కడ ఏదో ఉన్నట్లు తెలిపాయి. తవ్వి చూశాం. కింది నుంచి కాల్పులు జరిపారు. ఈ ఘటనలో నలుగురు లష్కరే తోయిబా ఉగ్రవాదులను మట్టుబెట్టాం. "

- దిల్బాగ్​ సింగ్​, జమ్ముకశ్మీర్ డీజీపీ

గత ఏడాది ఇలాంటి ఘటనే పుల్వామా-షోపియాన్​ సరిహద్దులోని లాసిపుర్​ ప్రాంతంలో జరిగినట్లు తెలిపారు దిల్బాగ్​ సింగ్​. ఓ ఇంటిలో ఆరు సార్లు తనిఖీలు నిర్వహించినా ఎలాంటి ఆచూకీ లభించ లేదని.. చివరి ప్రయత్నంలో సెప్టిక్​ ట్యాంక్​లో ఇద్దరు ముష్కరులను గుర్తించినట్లు చెప్పారు. ముఖ్యంగా దక్షిణ కశ్మీర్​లోని పలు ఇళ్లల్లో వంట గది, పడక గదుల్లో నకిలీ గోడలు, వాటి వెనక బంకర్లు ఉండటం బయటపడినట్లు తెలిపారు.

డ్రోన్ల సాయం..

సైన్యం నుంచి తప్పించుకునేందుకు జుబేర్​ వానీ నేతృత్వంలోని ఉగ్రవాదులు.. రాంబి ప్రాంతంలోని నది మధ్యలో ఇనుప బాక్సులను ఏర్పాటు చేసుకుని ఉండటాన్ని కొద్ది రోజుల క్రితం గుర్తించి వారిని మట్టుబెట్టారు. భూగర్భ బంకర్లు, నకిలీ గుంతల్లో నక్కి ఉన్న ఉగ్రవాదులను గుర్తించేందుకు అధునాతన డ్రోన్లను వినియోగిస్తున్నట్లు తెలిపారు అధికారులు.

ఇదీ చూడండి:సైన్యం కళ్లు కప్పి.. బంకర్లలో దాగి!