"బాలాకోట్​ దాడి 'సాంకేతిక' విజయం"

బాలాకోట్​ వైమానిక దాడుల్లో అత్యాధునిక సాంకేతికతతోనే విజయం సాధించామని భారత వాయుసేన అధిపతి బీఎస్ ధనోవా ఉద్ఘాటించారు. రఫేల్​ యుద్ధవిమానాలు సమయానికి వచ్చి ఉంటే ఫలితాలు భారీగా ఉండేవని స్పష్టం చేశారు.

బాలాకోట్​ వైమానిక దాడుల్లో భారత​ సాంకేతికతే కీలకమని వాయుసేన చీఫ్ మార్షల్​ బీఎస్ ధనోవా ఉద్ఘాటించారు. ఇదే దాడిలో రఫేల్​ యుద్ధ విమానాలను వాడి ఉంటే భారీ ఫలితాలు ఉండేవని తెలిపారు. దిల్లీలో జరిగిన '2040లో ఏరోస్పేస్​ పవర్​' చర్చా వేదికలో ధనోవా ప్రసంగించారు.

"బాలాకోట్​ ఆపరేషన్​లో అధునాతన సాంకేతికత మన వైపే ఉంది. పాకిస్థాన్​ భూభాగంలోకిరాత్రివేళ ప్రవేశించాం. చీకట్లోనూ సైనికేతర లక్ష్యాలను కచ్చితత్వంతో ధ్వంసం చేయగలిగాం. ఇందుకు 'ప్రెసిషన్​ స్టాండాఫ్' ఆయుధాలను వాడాం. ఈ దాడుల్లో ఆధునికీకరించిన మిగ్​-21 బైసన్​, మిరాజ్​-200 విమానాలను ఉపయోగించాం.ఆ సమయంలో మన వద్ద​ రఫేల్ యుద్ధ విమానాలు​ ఉండి ఉంటే భారీ స్థాయి ఫలితాలు ఉండేవి. రెండేళ్లలో రఫేల్ యుద్ధవిమానాలు, ఎస్​-400 క్షిపణి వ్యవస్థలు భారత అమ్ములపొదిలోకి చేరతాయి. "
- వాయుసేనాధిపతి బీఎస్ ధనోవా

బాలాకోట్​ దాడులకు ప్రతిస్పందనగా మరుసటిరోజే భారత సైన్య స్థావరాలపై దాడికి పాల్పడేందుకు పాక్​ ప్రయత్నం చేసింది. అయితే, పాక్​ విమానాలను సమర్థంగా తిప్పికొట్టామని, ఈ దాడిలో పాక్​ పూర్తిగా విఫలమయిందని తెలిపారు ధనోవా.

"పాక్​లోని ఉగ్రవాద స్థావరాలపైనే భారత్​ దాడి చేసింది. ఇందుకు ప్రతీకారంగా భారత సైనిక స్థావరాలపై దాడికి దిగింది పాక్. ఈ విషయంలో పాక్​ పూర్తిగా విఫలమయింది. మనం ప్రతిఘటించినప్పుడు ఒక యుద్ధ విమానంతో పాటు మన పైలట్​ వారికి చిక్కారు. "
- వాయుసేనాధిపతి బీఎస్ ధనోవా

ఇదీ చూడండి: 'రాజకీయం కాదు... సైన్యానికి స్వేచ్ఛ'