అక్కడా పది పరీక్షలు లేకుండానే పైతరగతులకు

10, 11 తరగతుల పరీక్షలు రద్దు చేసి, విద్యార్థులను పైతరగతులకు ప్రమోట్ చేస్తున్నట్లు ప్రకటించారు తమిళనాడు ముఖ్యమంత్రి కె.పళనిస్వామి. 12వ తరగతి పరీక్షలపై త్వరలో నిర్ణయం తీసుకుంటామని తెలిపారు. విద్యార్థుల జీవితాలతో ఆడుకోవద్దని హైకోర్టు ఆగ్రహం వ్యక్తం చేసిన నేపథ్యంలోనే ప్రభుత్వం ఈ కీలక నిర్ణయం తీసుకున్నట్లు తెలుస్తోంది.

తమిళనాడులో 10, 11 తరగతుల పరీక్షలు రద్దు చేస్తున్నట్లు ఆ రాష్ట్ర ముఖ్యమంత్రి కె. పళనిస్వామి ప్రకటించారు. అర్ధవార్షిక, త్రైమాసిక పరీక్షల ఫలితాలు, హాజరు శాతం ఆధారంగా విద్యార్థులను పైతరగతులకు పంపిస్తున్నట్లు (ప్రమోట్) ఆయన స్పష్టం చేశారు. కరోనా విజృంభిస్తోన్న నేపథ్యంలో పరీక్షలు నిర్వహించడం కుదిరే పని కాదని తేల్చిచెప్పారు.

12వ తరగతి పరీక్షల నిర్వహణపై త్వరలో నిర్ణయం తీసుకుంటామని పళనిస్వామి వెల్లడించారు. కరోనా కాలంలో 9 లక్షల మంది విద్యార్థుల జీవితాలను ఫణంగా పెట్టి, పరీక్షలు నిర్వహించడం ఏ మేరకు సబబు అని మద్రాస్ హైకోర్టు అక్షింతలు వేసిన నేపథ్యంలోనే ప్రభుత్వం ఈ కీలక నిర్ణయం తీసుకుంది.

ఇది వరకే తెలంగాణ ప్రభుత్వం కూడా పరీక్షలు లేకుండానే 10వ తరగతి విద్యార్థులను పైతరగతులకు ప్రమోట్​ చేస్తున్నట్లు ప్రకటించింది.

ఇదీ చూడండి:తక్షణ శక్తి కోసం.. సినమన్ హాట్​ చాక్లెట్