చిన్నారి బతకదన్నారు.. కానీ జయించింది!

తమిళనాడులో రెండు నెలల క్రితం నెలలు నిండకుండానే 855 గ్రాముల బరువుతో ఓ చిన్నారి జన్మించింది. ఆరోగ్యం విషమంగా ఉన్న ఆ చిన్నారి చనిపోతుందని వైద్యులు కూడా అన్నారు. కానీ స్థానిక ప్రభుత్వ ఆసుపత్రి వైద్యుల కృషితో పాప ఆరోగ్యం కుదుటపడింది. 60 రోజుల శ్రమతో ఇప్పుడు పాప 1.2 కిలోల బరువుకు చేరుకుంది.

తమిళనాడు హోసూర్​లో నివాసముండే పుత్రాజ్​ భార్య తేజస్వినికి ఈ ఏడాది మే 15న నెలలు నిండకుండానే పురిటి నొప్పులు వచ్చాయి. వెంటనే స్థానిక ప్రైవేటు ఆసుపత్రికి తీసుకెళ్లారు. గర్భిణికి అధిక రక్తపోటు ఉందని వైద్యులు గుర్తించారు. తల్లిని మాత్రమే కాపాడగలమని పుత్రాజ్​కు చెప్పారు. తప్పని పరిస్థితుల్లో బిడ్డను నెలలు నిండకుండానే ఆపరేషన్​ చేసి తీశారు. అలా 855 గ్రాముల ఆడపిల్లకు జన్మనిచ్చింది తేజస్విని.

పాప బతకటం చాలా కష్టమని వైద్యులు సహా అంతా అనుకున్నారు.
ఎంతైనా కన్నపేగుపై మమకారం ఊరుకుంటుందా...? పుట్టిన పాపను ఎలాగైనా కాపాడుకోవాలనుకున్నారు ఆ దంపతులు. తక్కువ బరువుతో పుట్టిన చిన్నారి ఆరోగ్య పరిస్థితి విషమించక ముందే స్థానిక ప్రభుత్వ ఆసుపత్రికి తీసుకెళ్లారు.

అక్కడ వైద్యులు 60 రోజులపాటు పాపకు ఎంతో జాగ్రత్తగా చికిత్స అందించారు. ఆరోగ్యం మెరుగుపడ్డాక తల్లిదండ్రులకు అప్పగించారు. వైద్యుల కృషి, తల్లిదండ్రుల ప్రేమానురాగాల ఫలితంగా ఇప్పుడా పసిపాప 1200 గ్రాముల బరువుకు చేరుకుని ఆరోగ్యంగా ఉంది.

వైద్యులు చేసిన మేలుకు చిన్నారి తల్లిదండ్రులు కృతజ్ఞతలు తెలిపారు.