ఇద్దరు పెళ్లాల ముద్దుల మొగుడితో పోలీసులకు తిప్పలు

ఓ భర్త. ఇద్దరు భార్యలు. ఓ ఒప్పందం.. ఇప్పుడు ఇవి ఝార్ఖండ్​లోని సదర్​ పోలీసులను తలలు పట్టుకునేలా చేస్తున్నాయి. తన భర్త రెండో వివాహాన్ని అంగీకరించి ఓ ఒప్పందం కుదుర్చుకున్న మొదటి భార్య.. ఇప్పుడు చింతిస్తోంది. ఒప్పందం ప్రకారం తన భర్త మూడు రోజులు తన వద్ద ఉండాలని.. కానీ ఐదురోజులైనా రాలేదని ఏడుస్తూ పోలీసులకు తన బాధను చెప్పుకుంది. ఏం చెయ్యాలో తెలియక పోలీసులు అయోమయంలో పడ్డారు.

భర్త మోసం చేసి మరో మహిళతో పరారయ్యాడని ఝార్ఖండ్​ రాంచీలోని సదర్ పోలీస్​ స్టేషన్​లో ఫిర్యాదు చేసింది ఓ మహిళ. వివరాలు తెలుసుకున్న పోలీసులు షాక్​కు గురయ్యారు. భర్తను చెరో మూడు రోజులు పంచుకునేలా తమ మధ్య ఒప్పందం కుదిరిందని.. కానీ ఇప్పుడు తాను మోసపోయానని మొదటి భార్య చెప్పగానే ఏం చేయాలో తెలియక పోలీసులు తలలు పట్టుకున్నారు.

ఒప్పందం ప్రకారం...

రాంచీలోని దర్​వుసల్​కు చెందిన రమేశ్​ కుమార్​ మహతోకు గతంలోనే పెళ్లి అయింది. అయినా మరో మహిళతో ప్రేమలో పడ్డాడు. మొదటి భార్యకు తెలియకుండా గతనెల 31న రహస్యంగా రెండో పెళ్లి చేసుకున్నాడు. విషయం తెలుసుకున్న మొదటి భార్య... భర్తపై కేసు పెట్టింది. రెండో భార్య తరఫు బంధువులు కూడా రమేశ్​.. తమ అమ్మాయిని కిడ్నాప్ చేశాడని కేసు పెట్టారు.

దిక్కు తోచని స్థితిలో.. మొదటి భార్యను ఆశ్రయించాడు రమేశ్​. ఎలాగైనా తనను కేసుల నుంచి బయటకు తీసుకురావాలని ప్రాధేయపడ్డాడు. అందుకు కనికరించిన ఆమె అతడితో ఓ ఒప్పందం కుదుర్చుకుని పోలీసుల నుంచి విడిపించింది.

చెరో మూడు రోజులు

రెండో పెళ్లి చేసుకున్న భర్తను పెద్ద మనసుతో క్షమించింది మొదటి భార్య. వారంలో.. తన వద్ద మూడు రోజులు, మరో మూడు రోజులు రెండో భార్య వద్ద ఉండేలా అధికారిక ఒప్పందం కుదుర్చుకుంది. మిగిలిన ఒక్కరోజు రమేశ్​ ఎవరితోనూ ఉండడు.

పరిస్థితులు మారడం వల్ల రెండో భార్య బంధువులూ కేసును వెనక్కి తీసుకున్నారు. తమ అమ్మాయి కావాలనే రమేశ్​తో వెళ్లిపోయిందని తెలుసుకున్నారు. అయితే ఆమెను ఇంటికి రావొద్దని తేల్చి చెప్పారు.

ఒప్పందం బ్రేక్​...

అయితే రెండో భార్య వద్దకు వెళ్లిన రమేశ్​ ఒప్పందం ప్రకారం 3 రోజుల తర్వాత తిరిగి రావాలి. కానీ 5 రోజులు దాటినా మొదటి భార్య వద్దకు రాలేదు. దీంతో ఏం చేయాలో ఆమెకు తెలియలేదు. చివరికి తన భర్త ఒప్పందాన్ని ఉల్లఘించాడని పోలీస్ స్టేషన్​ను ఆశ్రయించి. రాజేశ్​కు పోలీసులు ఫోన్​ చేసినా ఎలాంటి స్పందన లేదు. కానీ అతడు రెండో భార్యతో కలిసి బిహార్​ పారిపోయినట్లు పోలీసులకు తెలిసింది.

ఏం చేయాలో తెలియక తికమక

తన భర్తను తీసుకొచ్చి న్యాయం చేయాలని పోలీసులను వేడుకుంటోంది రమేశ్​ మొదటి భార్య. ఈ కేసును ఎలా పరిష్కరించాలో తెలియక అయోమయంలో పడ్డారు పోలీసులు.

ఇదీ చూడండి: మద్యం.. ఇకపై ఒక బాటిల్​కు మించి దొరకదు!