గాంధీనగర్​లో అమిత్​షా రోడ్​షో

సొంత నియోజకవర్గం​లో ప్రచారం ప్రారంభించారు భాజపా అధ్యక్షుడు అమిత్​షా. గుజరాత్ గాంధీనగర్​లో రోడ్​షో నిర్వహించారు.

భారతీయ జనతాపార్టీ 39వ ఆవిర్భావం రోజున, ఆ పార్టీ అధ్యక్షుడు అమిత్​షా గుజరాత్​లోని గాంధీనగర్​లో రోడ్​షో నిర్వహించారు. గాంధీనగర్​ లోక్​సభ స్థానం నుంచి స్వయంగా పోటీ చేస్తున్న ఆయన విజయమే లక్ష్యంగా ప్రచారాన్ని సాగిస్తున్నారు.

అహ్మదాబాద్ సార్ఖెజ్​ నుంచి అమిత్​షా రోడ్​షో ప్రారంభించారు. ఆయనతోపాటు, గుజరాత్ రాష్ట్ర భాజపా అధ్యక్షుడు జితూ వాఘాని ప్రచారంలో పాల్గొన్నారు. ప్రచారానికి ముందు అమిత్​షా, జనసంఘ్​ వ్యవస్థాపకుడు దీన్​ దయాళ్ ఉపాధ్యాయ, శ్యామా ప్రసాద్​ ముఖర్జీ చిత్రాలతో కూడిన దండ ధరించారు.

జమ్ముకశ్మీర్లో ఆర్టికల్ 370 రద్దు చేయాలని భాజపా పగటికలలు కంటోందని పీడీపీ అధినేత్రి మెహబూబా ముఫ్తీ చేసిన వ్యాఖ్యలపై అమిత్​షా మండిపడ్డారు. కశ్మీర్ ఎప్పటికీ భారతదేశానిదేనని నొక్కి చెప్పారు.

"శ్యామా ప్రసాద్​ ముఖర్జీ ఎక్కడ తన ప్రాణాలను అర్పించారో, ఆ కశ్మీర్​ మనది. మొత్తం కశ్మీర్ మనది."
- అమిత్​షా, భాజపా అధ్యక్షుడు

సాయంత్రం సబర్మతీ ప్రాంతంలో అమిత్​షా ప్రచారం చేస్తారు. రాత్రి భోపాల్​లోని పార్టీ కార్యకర్తలతో భేటీ అవుతారు.

అడ్వాణీ స్థానంలో...

భాజపా వ్యవస్థాపకుల్లో ఒకరైన ఎల్​కే ఆడ్వాణీ, గాంధీనగర్​లో 1998 నుంచి అప్రతిహతంగా గెలుస్తూ వస్తున్నారు. ఈ ఎన్నికల్లో ఆ స్థానం నుంచి అమిత్​షా బరిలోకి దిగారు.
అమిత్​షా లోక్​సభ ఎన్నికల్లో పోటీ చేయడం ఇదే తొలిసారి.

ఇదీ చూడండి: 'అవినీతా? నిజాయితీయా??... నిర్ణయం మీదే'