'21.5% చెన్నైవాసులపై కరోనా ప్రభావం!'

చెన్నైలో నిర్వహించిన సెరోలాజికల్​ సర్వేలో.. 21.5శాతం మందిలో ఇప్పటికే యాంటీబాడీలు అభివృద్ధి చెందినట్టు తెలిసింది. ఈ వివరాలను చెన్నై కార్పొరేషన్​ కమిషనర్​ వెల్లడించారు. రానున్న మూడు నెలలపాటు మాస్కులను తప్పకుండా ధరించాలని ప్రజలకు విజ్ఞప్తి చేశారు.

చెన్నైలోని 21.5శాతం మందిలో ఇప్పటికే వైరస్​కు సంబంధించిన యాంటీబాడీలు అభివృద్ధి చెందినట్లు ఓ సెరోలాజికల్​ సర్వేలో తేలింది. ఈ విషయాన్ని గ్రేటర్​ చెన్నై కార్పొరేషన్​(జీసీసీ) వెల్లడించింది.

సర్వేలో భాగంగా జులై నెలలో 12 వేల మంది నుంచి నమూనాలను సేకరించినట్టు జీసీసీ కమిషనర్​ ప్రకాశ్​ వెల్లడించారు. అయితే.. ఆంక్షలను ఎత్తివేసినప్పటికీ.. కరోనా నిబంధనలను కచ్చితంగా పాటించాలని ప్రజలకు విజ్ఞప్తి చేశారు ప్రకాశ్​. మస్కులు ధరించాలని, అనవసరమైన ప్రయాణాలు పెట్టుకోవద్దని సూచించారు.

ఆంక్షల సడలింపుతో కాంటాక్ట్​ ట్రేసింగ్​ కష్టమవుతుందని ప్రకాశ్​ అభిప్రాయపడ్డారు. గతంలో... ప్రతి 100మందిలో 30మందికి కరోనా సోకే ప్రమాదం ఉండగా.. ఇప్పుడు అది 9కి పడిపోయిందన్నారు.

తమిళనాడులో మంగళవారం నాటికి 52,578 యాక్టివ్​ కేసులున్నాయి. మొత్తం కేసుల సంఖ్య 4.3లక్షలను దాటింది. ఇప్పటివరకు 7,322మంది కరోనా ధాటికి బలయ్యారు.

ఇదీ చూడండి:-దేశంలో మరో 78,357 కేసులు, 1045 మరణాలు