చిదంబరానికి మధ్యంతర రక్షణ పొడిగింపు

కేంద్ర మాజీ మంత్రి చిదంబరానికి ఐఎన్​ఎక్స్​ మీడియా మనీ ల్యాండరింగ్ కేసులో గురువారం వరకు ఈడీ అరెస్టు నుంచి రక్షణ కల్పిస్తూ నిర్ణయం తీసుకుంది సుప్రీంకోర్టు. సీబీఐ కేసులో ముందస్తు బెయిల్ నిరాకరిస్తూ ఆగస్టు 20న దిల్లీ హైకోర్టు ఇచ్చిన తీర్పును సవాలు చేస్తూ దాఖలు చేసిన పిటిషన్​పై రేపు విచారణ చేపట్టనుంది.

ఐఎన్​ఎక్స్​ మీడియా మనీ ల్యాండరింగ్ కేసులో కేంద్ర మాజీ మంత్రి పి. చిదంబరానికి ఈడీ అరెస్టు నుంచి కల్పించిన మధ్యంతర రక్షణను గురువారం వరకు పొడిగించింది సుప్రీంకోర్టు.

జస్టిస్ ఆర్​. భానుమతి, జస్టిస్​ ఏఎస్ బోపన్నలతో కూడిన ధర్మాసనం ఎదుట ఎన్​ఫోర్స్​మెంట్ డైరెక్టరేట్ తరఫున సొలిసిటర్ జనరల్ తుషార్ మెహతా వాదనలు వినిపించారు. చిదంబరం తనను తాను బాధితుడిగా చిత్రీకరించుకుంటున్నారని... కేసు విషయంలో అరెస్టు చేయకుండా ఈడీని నిలువరిస్తున్నారని వ్యాఖ్యానించారు.

"ప్రతివాదులు ఆరోపిస్తున్నట్లుగా ఇది కక్షసాధింపు కాదు. మనీ ల్యాండరింగ్ కేసులో మా వద్ద బలమైన ఆధారాలు ఉన్నాయి."

-వాదనల సందర్భంగా తుషార్ మెహతా

ముందస్తు బెయిల్ నిరాకరిస్తూ దిల్లీ హైకోర్టు ఆగస్టు 20న ఇచ్చిన తీర్పును సవాలు చేస్తూ చిదంబరం దాఖలు చేసిన పిటిషన్​పై గురువారం విచారణ చేపట్టనుంది సుప్రీం.

ఇదీ చూడండి: కరాచీలోని 3 గగనతలాల్ని మూసేసిన పాకిస్థాన్