మన దేశ భద్రతా దళాల ధీరత్వాన్ని, గౌరవాన్ని తక్కువ చేసి మాట్లాడుతున్నారని కాంగ్రెస్ నేతలపై ఆగ్రహం వ్యక్తం చేశారు కేంద్ర మంత్రి రవిశంకర్ ప్రసాద్. ఉగ్రవాదుల శిబిరాలపై వాయుసేన దాడులకు ఆధారాలు అడగడమే ఇందుకు నిదర్శనమని అన్నారు.
కాంగ్రెస్ సీనియర్ నేతలు పి.చిదంబరం, కబిల్ సిబల్, దిగ్విజయ్ సింగ్ వ్యాఖ్యలపై స్పందించారు రవిశంకర్. వారు పాకిస్థాన్ తరఫున మాట్లాడుతున్నారని ఆగ్రహం వ్యక్తం చేశారు.
" వారు సొంతంగా మాట్లాడడం లేదు. రాహుల్ గాంధీ, సోనియా గాంధీ ఆశీర్వాదాలతో ఆధారాలు అడుగుతున్నారు."-- రవి శంకర్ ప్రసాద్, కేంద్ర మంత్రి
భారత వాయుసేన దాడులపై ఏ దేశం ఆధారాలు అడగలేదని రవిశంకర్ పేర్కొన్నారు. మన దేశ మీడియాను సైతం కాంగ్రెస్ నమ్మడం లేదని మండిపడ్డారు. మెరుపుదాడులకు ఆధారాలు అడిగి భద్రతా దళాల ధైర్యసాహసాలను, ప్రతిష్ఠను తక్కువ చేసి మాట్లాడుతున్నారని ఆగ్రహం వ్యక్తం చేశారు.
పశ్చిమ్ బంగ ముఖ్యమంత్రి మమతా బెనర్జీ వ్యాఖ్యలపైనా స్పందించారు రవిశంకర్. "మీరు అన్ని కష్టాలనూ చూశారు. అయినా ఎందుకిలా చేస్తున్నారు" అని దీదీని ప్రశ్నించారు.
