పోక్సో చట్ట సవరణ బిల్లుకు రాజ్యసభ ఆమోదం

పోక్సో చట్ట సవరణ బిల్లుకు రాజ్యసభ ఆమోదం తెలిపింది. చిన్నారులపై తీవ్రమైన లైంగిక నేరాలకు మరణశిక్ష విధించడం సహా పలు కఠినమైన మార్పులను తాజా బిల్లులో ప్రతిపాదించింది కేంద్రం. బిల్లుకు రాజ్యసభ ఆమోదం నేపథ్యంలో....తదుపరి ఆమోదం కోసం లోక్‌సభకు పంపనున్నారు.

చిన్నారులపై తీవ్రమైన లైంగిక వేధింపులకు పాల్పడిన వారికి మరణశిక్ష విధించే లక్ష్యంతో రూపొందించిన పోక్సో చట్ట సవరణ బిల్లుకు రాజ్యసభ ఏకగ్రీవంగా ఆమోదించింది. మైనర్లపై జరిగే ఇతర వేధింపులకు కఠినమైన శిక్షలు విధించేలా ఈ బిల్లులో మార్పులు చేశారు. పిల్లల అశ్లీల చిత్రాలను నియంత్రించేలా సవరణ చట్టం బిల్లులో నియమాలను పొందు పరిచారు.

పోక్సో కేసుల విచారణ కోసం దేశవ్యాప్తంగా కొత్తగా 1023 ఫాస్ట్​ట్రాక్​ కోర్టులను ఏర్పాటు చేయనున్నట్లు ప్రకటించారు స్మృతి ఇరానీ. ఈ కోర్టుల్లో పెండింగ్​లో ఉన్న కేసుల విచారణను చేపట్టనున్నామని స్పష్టం చేశారు. పార్టీలకు అతీతంగా బిల్లుకు మద్దతు లభించడంపై ఆనందం వ్యక్తం చేశారు.

" ఫాస్ట్​ట్రాక్ కోర్టులను 18 రాష్ట్రాల్లో 2019-2021 లోగా ఏర్పాటు చేస్తాం. రూ. 767 కోట్లు ఫాస్ట్ ట్రాక్ కోర్టుల ఏర్పాటుకు ఖర్చవుతాయి. ఇందులో రూ. 474 కోట్లు కేంద్రం భరిస్తుంది. నూతన చట్టాన్ని జాతీయ బాలల హక్కుల కమిషన్ ద్వారా నియంత్రించనున్నాం. ఒక సీనియర్ పోలీసు అధికారి రాష్ట్ర స్థాయి కమిషన్​కు బాధ్యుడిగా ఉంటారు. "

-స్మృతి ఇరానీ, కేంద్ర మహిళా, శిశు అభివృద్ధి శాఖ మంత్రి

చర్చ సందర్భంగా చిన్నారులపై లైంగిక వేధింపులు ఎక్కువగా తెలిసిన వారివల్లే జరుగుతున్నాయన్నారు తృణమూల్ సభ్యుడు డెరెక్ ఓబ్రెయిన్. ఇప్పటికీ 1.66 లక్షల కేసులు కోర్టుల్లో వివిధ దశల్లో కొనసాగుతున్నాయని గుర్తు చేశారు.

నూతన పోక్సో చట్టాన్ని సమర్థంగా అమలు చేయాలన్నారు బీఎస్పీ సభ్యుడు రాజారాం.

ఇదీ చూడండి: ఔరా: మహిళ పొట్టలో బంగారు నిధి