భవిష్యత్​ భాజపానేనా.. నేడు పైలట్ కీలక ప్రకటన

రాజస్థాన్‌లో రాజకీయాలు..రసవత్తరంగా సాగుతున్నాయి. సచిన్‌ పైలట్‌ వర్గాన్ని పార్టీ పదవులు, ప్రభుత్వం నుంచి తప్పించిన కాంగ్రెస్‌ మంత్రివర్గ పునర్​వ్యవస్థీకరణకు కసరత్తు చేస్తోంది. సచిన్‌ పైలట్‌ సైతం భవిష్యత్‌ కార్యచరణపై నేడు ప్రకటన చేసే అవకాశం ఉంది. తాజా పరిస్థితులపై చర్చించేందుకు ప్రతిపక్ష భాజపా నేడు జయపురలో సమావేశం కానుంది.

రాజస్థాన్‌లో రాజకీయ సమీకరణాలు శరవేగంగా మారుతున్నాయి. తిరుగుబాటు నేత సచిన్‌ పైలట్‌పై వేటు వేసిన కాంగ్రెస్‌ మంత్రివర్గాన్ని పునర్​వ్యవస్థీకరణ చేయాలని యోచిస్తోంది. ఈ అంశంపై ముఖ్యమంత్రి అశోక్​ గహ్లోత్​ నివాసంలో జరిగిన సమావేశంలో నేతలు సమావేశమయ్యారు. ఈ సమావేశంతో పాటు నిర్వహించిన మంత్రిమండలి భేటీలోనూ రాజస్థాన్‌లో తాజా పరిస్థితులపై మంత్రులు చర్చించినట్లు తెలుస్తోంది.

పీసీసీ అధ్యక్షుడిగా తొలగింపు

వరుసగా.. రెండో రోజు సమావేశమైన కాంగ్రెస్‌ శాసనసభాపక్షం తిరుగుబాటు నేత సచిన్‌ పైలట్‌పై వేటు వేసింది. సోనియా గాంధీ, రాహుల్‌, ప్రియాంక, అహ్మద్‌ పటేల్‌ వంటి అగ్రనేతలు మాట్లాడినా సీఎల్పీ భేటీకి పైలట్‌ వర్గం డుమ్మా కొట్టగా ఆయనకు ఉద్వాసన పలికే తీర్మానానికి సభ్యులు ఏకగ్రీవంగా ఆమోదం తెలిపారు. సీఎల్పీ సమావేశానికి వచ్చేందుకు రెండుసార్లు అవకాశం ఇచ్చినప్పటికీ పైలట్‌ నుంచి స్పందన రాకపోవడంతో ఆయనను తొలగించాలనే నిర్ణయానికి వచ్చినట్లు కాంగ్రెస్‌ తెలిపింది.

ఉపముఖ్యమంత్రి, పీసీసీ అధ్యక్ష పదవుల నుంచి పైలట్‌ను తప్పించినట్లు కాంగ్రెస్‌ అధికార ప్రతినిధి సుర్జేవాలా ప్రకటించారు. ఆయన విధేయులైన విశ్వేంద్ర సింగ్‌, రమేష్‌ మీనాను మంత్రి పదవుల నుంచి తప్పించింది. ఈ పరిస్థితుల్లో కాంగ్రెస్‌ నుంచి పూర్తిగా తెగదెంపులు చేసుకున్నట్లే కనిపిస్తున్న సచిన్‌ పైలట్ నేడు భవిష్యత్‌ కార్యాచరణ ప్రకటించే అవకాశం ఉంది.

కొత్త సారథి డోటాస్రా..

రాజస్థాన్‌ కాంగ్రెస్‌ ఇన్‌ఛార్జి అవినాశ్‌ పాండే పార్టీ కార్యనిర్వాహక మండలి సహా పీసీసీలోని అన్ని విభాగాలను రద్దు చేశారు. రాజస్థాన్‌ పీసీసీ అధ్యక్షుడిగా సచిన్‌ పైలట్‌ను తప్పించి నూతన సారథిగా గోవింద్‌ సింగ్‌ డోటాస్రాను నియమించారు. నూతన పీసీసీ అధ్యక్షుడి అనుమతి లేకుండా పార్టీ నేతలెవరూ మీడియాతో మాట్లాడకూడదని స్పష్టం చేశారు.

'తప్పేమిటో తెలపండి'

తమను పదవుల నుంచి తొలగించడంపై స్పందించారు జస్థాన్‌ మాజీ పర్యాటక మంత్రి విశ్వేంద్ర సింగ్‌. ఏ తప్పు చేశామని చర్యలు తీసుకున్నారంటూ ప్రశ్నించారు. ఎలాంటి పార్టీ వ్యతిరేక ప్రకటనలు చేయలేదని ఆయన తెలిపారు. రెండేళ్లుగా అధికారంలో ఉన్నప్పటికీ మేనిఫెస్టోలో పేర్కొన్న హామీలను అమలు చేయలేదన్న అంశాన్ని హైకమాండ్ దృష్టికి తీసకువెళ్లాలని మాత్రమే అనుకున్నట్లు వీడియో సందేశం ద్వారా వెల్లడించారు. పౌర సరఫరాల శాఖ మాజీ మంత్రి రమేశ్ మీనా.. తాను నిజాయతీతో పనిచేశానని, తనవిభాగం పని తీరును ప్రధాన మంత్రి కూడా కొనియాడినట్లు తెలిపారు.

రిసార్టుల్లోనే శాసనసభ్యులు

గహ్లోత్, పైలట్ వర్గాల రిసార్టు రాజకీయం కొనసాగుతోంది. సీఎల్పీ భేటీ ముగిసిన వెంటనే జయపురలోని ఫెయిర్​మౌంట్ హోటల్​కు ఎమ్మెల్యేలు, మంత్రులను తరలించారు. పైలట్​కు చెందిన మానెసర్ క్యాంప్ కొనసాగుతోంది.

నేడు భాజపా కీలక భేటీ

ఈ సంక్షోభం నేపథ్యంలో భాజపా అప్రమత్తమైంది. తాజా పరిస్థితులపై చర్చించేందుకు నేడు జయపురలో సమావేశంకానుంది. ఈ సమావేశంలో భాజపా సీనియర్​ నాయకులు పాల్గొననున్నట్టు తెలుస్తోంది. అయితే భాజపా కీలక నేత, రాజస్థాన్‌ మాజీ ముఖ్యమంత్రి వసుంధర రాజే ప్రస్తుతం ధోల్​పుర్​లో ఉన్నారు. ఆమె జయపుర​కు చేరుకున్న వెంటనే ఈ భేటీ ప్రారంభం కానుంది.

ఇదీ చూడండి:రాజస్థాన్​ సంక్షోభంపై భాజపా వ్యూహమేంటి?