"అమేఠీ ప్రజలకు రాహుల్​ భావోద్వేగ లేఖ"

అమేఠీ లోక్​సభ ఎన్నికల ముందు సొంత నియోజకవర్గ ప్రజలకు కాంగ్రెస్​ అధ్యక్షుడు రాహుల్​ గాంధీ భావోద్వేగ లేఖ రాశారు. కాంగ్రెస్​ అధికారంలోకి రాగానే భాజపా అడ్డుకున్న అభివృద్ధి పనులను వేగవంతం చేస్తామని హామీ ఇచ్చారు. మే 6న జరిగే ఎన్నికల్లో రికార్డు స్థాయిలో ఓటింగ్​ శాతం నమోదు చేయాలని పిలుపునిచ్చారు.

సార్వత్రిక ఎన్నికల ఐదో దశ ముందు సొంత నియోజకవర్గం అమేఠీ ప్రజలకు కాంగ్రెస్​ పార్టీ అధ్యక్షుడు రాహుల్​ గాంధీ భావోద్వేగ లేఖ రాశారు. సమస్యలను ఎదుర్కొనే శక్తిని అమేఠీ ప్రజల నుంచే పొందానని పేర్కొన్నారు. అమేఠీలో భాజపా ప్రభుత్వం అడ్డుకున్న అభివృద్ధి పనులను కాంగ్రెస్​ అధికారంలోకి రాగానే వేగవంతం చేస్తామని హామీ ఇచ్చారు.

" కేంద్రంలో కాంగ్రెస్ ప్రభుత్వం ఏర్పాటు చేసిన వెంటనే భాజపా అడ్డుకున్న అభివృద్ధి పనులను ప్రారంభిస్తామని అమేఠీ ప్రజలకు హామీ ఇస్తున్నా. మీ కుటుంబంలోని వ్యక్తిని తిరిగి గెలిపించేందుకు మే 6న పెద్ద సంఖ్యలో ఓట్లు వేయండి. " - రాహుల్​ గాంధీ, కాంగ్రెస్​ అధ్యక్షుడు.

ఎన్నికల సమయంలో భాజపా చెప్పే అబద్ధాలను అమేఠీ ప్రజలు నమ్మరని పేర్కొన్నారు రాహుల్​. నిజాయతీ, సమగ్రతలు అమేఠీ ప్రజల బలమన్న విషయం కాషాయపార్టీకి తెలియదన్నారు. కాంగ్రెస్​ హయాంలో ప్రజలే యజమానులని తెలిపారు. కానీ భాజపా పాలనలో ధనిక వ్యాపారులే యజమానులని ఆరోపించారు.

రాహుల్​ గాంధీ లేఖను సామాజిక మాధ్యమాల్లో పోస్ట్​ చేసినట్టు ఉత్తర్​ప్రదేశ్​ కాంగ్రెస్​ ప్రతినిధి అన్షు అవస్థి తెలిపారు. అధ్యక్షుడి సందేశాన్ని అమేఠీలో గడప గడపకు చేరవేయాలని పార్టీ కార్యకర్తలకు పిలుపునిచ్చారు.

ఇదీ చూడండి:"రాహుల్​ను ఎత్తుకున్న మొదటి వ్యక్తిని నేనే"