కాంగ్రెస్ నేత రాహుల్ గాంధీకి ఊరట లభించింది. పరువు నష్టం కేసులో అహ్మదాబాద్ మెజిస్ట్రేట్ కోర్టు ఆయనకు బెయిల్ మంజూరు చేసింది. రాహుల్పై అహ్మదాబాద్ జిల్లా కో ఆపరేటివ్ బ్యాంక్(ఏడీసీ) ఛైర్మన్ అజయ్ పటేల్ గతేడాది ఈ పరువు నష్టం దావా వేశారు.
విచారణకు స్వయంగా హాజరయ్యారు రాహుల్. తనపై వచ్చిన అభియోగాలు అంగీకరిస్తున్నారా అని రాహుల్ను అడిగారు అదనపు చీఫ్ మెట్రోపాలిటన్ మెజిస్ట్రేట్ ఎన్. బీ మున్షి. అందుకు రాహుల్ నిరాకరించారు. అనంతరం బెయిల్ మంజూరైంది.
ఈ కేసు విచారణ కోసం కాంగ్రెస్ జాతీయ అధికార ప్రతినిధి రణదీప్సింగ్ సుర్జేవాలా శనివారం అహ్మదాబాద్ మెజిస్ట్రేట్ కోర్టు ముందు హాజరుకానున్నారు.
కేసు వివరాలు..
రాహుల్ గాంధీ, కాంగ్రెస్ అధికార ప్రతినిధి రణదీప్ సుర్జేవాలా గతంలో.. అహ్మదాబాద్ జిల్లా సహకార బ్యాంకుపై తీవ్ర ఆరోపణలు చేశారు. 2016 నవంబర్ 8న నోట్లరద్దు ప్రకటించిన ఐదు రోజుల్లో.. రూ.745.59 కోట్ల మేర ఈ బ్యాంకు నోట్ల మార్పిడి కుంభకోణానికి పాల్పడిందని ఆరోపించారు.
ముంబయికి చెందిన ఓ కార్యకర్త ఆర్టీఐ ద్వారా అడిగిన ప్రశ్నకు బ్యాంక్ ఫర్ అగ్రికల్చర్ అండ్ రూరల్ డెవలప్మెంట్ ఇచ్చిన సమాధానం ఆధారంగానే రాహుల్ గాంధీ, సుర్జేవాలా ఏడీసీ బ్యాంకుపై ఆరోపణలు చేశారు.
అయితే ఈ ఆరోపణలను ఖండించిన ఏడీసీ బ్యాంకుతో పాటు ఛైర్మన్ అజయ్ పటేల్ వ్యక్తిగతంగా... ఈ ఇరువురు నేతలపై పరువునష్టం కేసు దాఖలు చేశారు. కేంద్ర హోంమంత్రి అమిత్షా ఈ ఏడీసీ బ్యాంకు డైరెక్టర్లలో ఒకరు కావడం గమనార్హం.
ఈ కేసులో ప్రాథమిక సాక్ష్యాలను పరిశీలించిన న్యాయస్థానం ఏప్రిల్ 9న రాహుల్గాంధీ, రణ్దీప్ సుర్జేవాలాకు సమన్లు జారీ చేసింది.
