'ఇప్పుడు.. అప్పుడు.. ఎప్పుడూ రాహులే అధ్యక్షుడు'

కాంగ్రెస్​ పార్టీ అధ్యక్షుడిగా ఎప్పటికీ రాహుల్​ గాంధీనే వ్యవహరిస్తారని పార్టీ అధికార ప్రతినిధి రణ్​దీప్​ సుర్జేవాలా స్పష్టం చేశారు. అధ్యక్షుడి పదవి నుంచి రాహుల్​ వైదొలుగుతారన్న ఊహాగానాల నేపథ్యంలో ఈ వ్యాఖ్యలు ప్రాధాన్యం సంతరించుకున్నాయి.

కాంగ్రెస్ అధ్యక్ష పదవి నుంచి రాహుల్ గాంధీ వైదొలుగుతారన్న ఊహాగానాలకు చెక్​ పెట్టారు ఆ పార్టీ అధికార ప్రతినిధి రణ్​దీప్​ సింగ్ సుర్జేవాలా. "అప్పుడు.. ఇప్పుడు.. ఎప్పుడూ రాహులే అధ్యక్షుడి"గా ఉంటారని స్పష్టం చేశారు.

త్వరలో జరగబోయే నాలుగు రాష్ట్రాల అసెంబ్లీ ఎన్నికలపై చర్చించేందుకు దిల్లీలోని సీనియర్​ నేత ఏకే ఆంటోని ఇంటికి వెళ్లారు సుర్జేవాలా. ఈ సందర్భంగా మీడియా అడిగిన ప్రశ్నలకు ఈమేరకు సమాధానం ఇచ్చారు.

సార్వత్రిక ఎన్నికల్లో ఘోర పరాజయం తర్వాత మే 25న జరిగిన కాంగ్రెస్ వర్కింగ్​ కమిటీ సమావేశంలో రాజీనామా చేస్తానని రాహుల్ ప్రతిపాదించారు. కమిటీ సభ్యులు మాత్రం నిర్ద్వంద్వంగా తిరస్కరించారు.

ఇదీ చూడండి: 'ఓటమికి బాధ్యుల్లో ఆ ముగ్గురే కీలకం'