ఆ ఆస్పత్రిలోని కరోనా రోగులకు కొత్త ఔషధం!

కరోనా రోగులపై ప్రభావవంతంగా పనిచేస్తోన్న కొత్త ఔషధం టోసిలిజుమాబ్​ను వినియోగించేందుకు పుణె ఆస్పత్రి సిద్ధమవుతోంది. ఇందుకోసం ఓ టాస్క్​ఫోర్స్​ను ఏర్పాటు చేసింది. త్వరలోనే తొలిదశలో 25 మంది రోగులకు ఈ ఔషధం ఇవ్వనున్నట్లు అధికారులు తెలిపారు.

కరోనా రోగులకు ఉపశమనం కల్పిస్తోన్న కొత్త ఔషధాన్ని వినియోగించేందుకు పుణెలోని ససూన్​ జనరల్​ ప్రభుత్వ ఆస్పత్రి సన్నాహాలు చేస్తోంది. ప్రస్తుతం తీవ్ర అనారోగ్యంతో ఆస్పత్రిలో చికిత్స పొందుతోన్న కనీసం 25 మంది రోగులకు ‘టోసిలిజుమాబ్​ ఔషధాన్ని త్వరలోనే ఇవ్వనున్నట్లు అధికారులు తెలిపారు.

" ఈ కొత్త ఔషధం విలువ సుమారు రూ. 20వేల వరకు ఉంటుంది. తొలి దశలో 25 మంది రోగులకు ఇవ్వనున్నాం. ఫలితాల ఆధారంగా తదుపరి చర్యలపై పుణె మున్సిపల్​ కార్పొరేషన్​ నిర్ణయం తీసుకుంటుంది. కొవిడ్​-19 రోగులు తీవ్ర అనారోగ్యానికి గురైన సందర్భంలో టొసిలిజుమాబ్​ ఇచ్చేందుకు డా. డీబీ కదమ్​ నేతృత్వంలో ప్రత్యేక వైద్యుల బృందాన్ని ఏర్పాటు చేశారు. కరోనా సోకిన రోగుల్లో 50 ఏళ్లలోపు వారిలో సైటోకైన్​ స్టోర్మ్​ లక్షణాలతో పాటు, జ్వరం, ఆక్సిజన్​ అవసరమైన వారికి ఈ మందును టాస్క్​ఫోర్స్​ సిఫార్సు​ చేస్తుంది. "

- శేఖర్​ గైక్వాడ్​, పుణె పురపాలక కమిషనర్​

భారతీ ఆస్పత్రిలో కరోనా ప్రభావంతో తీవ్ర అనారోగ్యానికి గురైన అంగన్​వాడీ కార్యకర్తకు టొలిసిజుమాబ్​ అందించినట్లు తెలిపారు గైక్వాడ్​. ఆమె అనుహ్య రీతిలో కోలుకుందన్నారు. ముంబయిలోని సివిల్​ ఆస్పత్రిలో కూడా ఈ మందును వినియోగించగా.. మంచి ఫలితాలు వచ్చినట్లు తెలిపారు.

దేశంలోనే మహారాష్ట్ర కరోనా కేసుల్లో తొలిస్థానంలో ఉంది. అందులో పుణె జిల్లా ముంబయి తర్వాత రెండోస్థానంలో ఉంది. ఇప్పటి వరకు 4,809 కేసులు నమోదు కాగా 242 మంది ప్రాణాలు కోల్పోయారు.