వీవీప్యాట్ రసీదుల లెక్కింపుపై ఎన్నికల సంఘం వివరణ వీవీప్యాట్ రసీదుల లెక్కింపుపై సుప్రీంకోర్టులో అఫిడవిట్ దాఖలు చేసింది భారత ఎన్నికల సంఘం. ఒక్కో శాసనసభ నియోజకవర్గానికి ఒక్కో వీవీప్యాట్ ఓటింగ్ యంత్రంలోని రసీదులను లెక్కించే ప్రస్తుత పద్ధతే సరైనదని అభిప్రాయపడింది.
ప్రతి అసెంబ్లీ నియోజకవర్గంలోని 50 శాతం ఓటింగ్ యంత్రాల వీవీప్యాట్ స్లిప్పులను లెక్కించాలని ఆంధ్రప్రదేశ్ ముఖ్యమంత్రి చంద్రబాబు నేతృత్వంలో 21 విపక్ష పార్టీలు సుప్రీంకోర్టును ఆశ్రయించాయి. ప్రతిపక్షాల పిటిషన్పై స్పందించాలని ఈ నెల 25న ఎన్నికల సంఘాన్ని ఆదేశించింది కోర్టు.
ఎన్నికల నిర్వహణపై వచ్చిన పిటిషన్లను అధ్యయనం చేసినట్లు అఫిడవిట్లో పేర్కొంది ఎన్నికల సంఘం. ప్రస్తుత విధానాన్ని మార్చడానికి తగిన కారణాలను పిటిషనర్లుచూపలేకపోయారని వివరించింది. రాబోయే ఎన్నికలకూ ప్రస్తుత పద్ధతే సరైనదని నివేదించింది. ఎన్నికలు పారదర్శకంగా నిర్వహించడానికి సలహాలు స్వీకరిస్తామని తెలిపింది.
