'మీ త్యాగాలను దేశం ఎప్పటికీ మరిచిపోదు'

హంద్వారాలో శనివారం రాత్రి నుంచి జరిగిన ఎదురుకాల్పుల్లో లష్కరే తొయిబా ఉగ్ర సంస్థ టాప్​ కమాండర్​ను హతమార్చింది భారత సైన్యం. మరో ముష్కరుడూ చనిపోయినట్లు జమ్ముకశ్మీర్​ పోలీసు వర్గాలు వెల్లడించాయి. అంతకుముందు ఉగ్రవాదులు.. కల్నల్​, మేజర్​, పోలీస్​ సబ్​ ఇన్​స్పెక్టర్​ సహా మొత్తం ఐదుగురిని బలిగొన్నారు. అమర జవాన్లకు ప్రధాని నరేంద్ర మోదీ, కేంద్ర హోం, రక్షణ మంత్రులు నివాళులు అర్పించారు.

జమ్ముకశ్మీర్​లో జరిగిన భీకర ఎన్​కౌంటర్​లో లష్కరే తొయిబా ఉగ్రసంస్థ ఉగ్రనేత హతమయ్యాడు. భారత సైన్యానికి చెందిన కల్నల్​, మేజర్ సహా మొత్తం ఐదుగురు అమరులయ్యారు.

కుప్వారా జిల్లా హంద్వారాలో పౌరుల్ని బందీలుగా ఉంచారన్న సమాచారం మేరకు శనివారం రక్షణ చర్యలు చేపట్టిన భద్రతా బలగాలపై కాల్పులు జరిపారు ఉగ్రవాదులు. అనేక గంటలపాటు సాగిన ఈ ఎన్​కౌంటర్​లో 21 రాష్ట్రీయ రైఫిల్​ విభాగం కమాండింగ్​ ఆఫీసర్​ కల్నల్​ అశుతోష్​ శర్మ, మేజర్​ అనుజ్​ సూద్​, మరో ఇద్దరు జవాన్లు, జమ్ముకశ్మీర్​ పోలీస్​ సబ్​ఇన్​స్పెక్టర్​ వీరమరణం పొందారు.

అమరులయ్యే ముందు కల్నల్​ నేతృత్వంలోని బృందం.. ఉగ్రవాదుల చెర నుంచి పౌరుల్ని రక్షించింది. ఇద్దరు ముష్కరుల్ని మట్టుబెట్టింది. ఇందులో కరుడుగట్టిన పాక్​ ఉగ్రసంస్థ లష్కరే తొయిబా టాప్​ కమాండర్​ హైదర్​ ఉన్నాడు. మరొకరి గురించి తెలియాల్సి ఉంది.

శౌర్యానికి మారుపేరు శర్మ..

ఉగ్రవాదులు జరిపిన భీకర కాల్పుల్లో అమరులైన కల్నల్​ అశుతోష్​ శర్మ గతంలో ఎన్నో ఉగ్రనిరోధక కార్యకలాపాల్లో పాల్గొన్నారు. ఆయన ధైర్యసాహసాలకు మెచ్చిన కేంద్ర ప్రభుత్వం రెండుసార్లు సేన పురస్కారాన్ని ప్రదానం చేసింది.

మీ త్యాగం చిరస్మరణీయం..

సాధారణ పౌరుల్ని రక్షిస్తూ ప్రాణాలు కోల్పోయిన కల్నల్​, మేజర్​ సహా సైనికుల మృతిపై ప్రధాని నరేంద్ర మోదీ విచారం వ్యక్తం చేశారు. వారి త్యాగాలు మరువలేనివని ట్వీట్​ చేశారు.

మోదీ ట్వీట్​

''అమరులైన సైనికులు, భద్రతా సిబ్బంది త్యాగం మరువలేనది. దేశరక్షణ కోసం ఎంతో నిబద్ధతతో సేవచేశారు. మనపౌరుల్ని రక్షించడం కోసం అవిరళ కృషి చేశారు. వారి కుటుంబసభ్యులు, ఆత్మీయులకు నా ప్రగాఢ సానుభూతి.''

- నరేంద్ర మోదీ, ప్రధాన మంత్రి.

భద్రతా సిబ్బంది ప్రాణాలు కోల్పోవడం బాధాకరమని అన్నారు రక్షణ మంత్రి రాజ్​నాథ్​ సింగ్​. వారి అసమాన ధైర్యసాహసాలను దేశం మరిచిపోదని ట్వీట్​ చేశారు.

షా ట్వీట్​

దేశం కోసం అమరులైన సైనికులకు నివాళులు అర్పించారు కేంద్ర హోం మంత్రి అమిత్​ షా. వారి కుటుంబసభ్యులకు సానుభూతి తెలిపారు. త్రిదళాధిపతి జనరల్​ బిపిన్​ రావత్​, ఆర్మీ చీఫ్​ నరవాణె.. ప్రాణాలు కోల్పోయిన వీరులకు నివాళులర్పించారు.