ఐదేళ్ల వ్యవధిలో 58 దేశాలు చుట్టేసిన మోదీ

2015 నుంచి ప్రధాని నరేంద్ర మోదీ 58 దేశాల్లో పర్యటించారని కేంద్రం వెల్లడించింది. ఇందుకు రూ.517 కోట్లు ఖర్చు అయినట్లు తెలిపింది. అత్యధికంగా అమెరికా, రష్యా, చైనా దేశాల్లో ఐదేసి సార్లు పర్యటించినట్లు పేర్కొంది. నేపాల్​తో సంబంధాలు భారత్​కు ప్రత్యేకమేనని స్పష్టం చేసింది.

2015 నుంచి ఇప్పటివరకు ప్రధానమంత్రి నరేంద్ర మోదీ 58 దేశాల్లో పర్యటించినట్లు కేంద్రం తెలిపింది. ఈ పర్యటనలకు రూ.517.18 కోట్ల వ్యయం అయినట్లు రాజ్యసభకు వెల్లడించింది.

మోదీ చేపట్టిన పర్యటనలు, వాటి ఫలితాలపై సభ్యులు అడిగిన ప్రశ్నకు విదేశాంగ సహాయ మంత్రి వీ మురళీధరన్ లిఖితపూర్వకంగా సమాధానం ఇచ్చారు.

చైనాకు ఐదు సార్లు

మురళీధరన్ వెల్లడించిన వివరాల ప్రకారం అమెరికా, రష్యా, చైనా దేశాలకు ప్రధాని ఐదేసి సార్లు పయనమయ్యారు. సింగపూర్, ఫ్రాన్స్, శ్రీలంక, యూఏఈ వంటి దేశాలకు ఒకటికంటే ఎక్కువసార్లు వెళ్లారు. ఆయా పర్యటనల్లో భాగంగా కొన్ని సార్లు ఒకటికి మించి దేశాలను చుట్టిరాగా.. మరికొన్నిసార్లు ద్వైపాక్షిక సందర్శనలు చేశారు. చివరిసారిగా మోదీ.. బ్రిక్స్ దేశాల శిఖరాగ్ర సదస్సులో హాజరయ్యేందుకు బ్రెజిల్​కు వెళ్లారు. 2019 నవంబర్ 13-14 మధ్య ఈ పర్యటన నిర్వహించారు.

పర్యటనల ఫలితాలు

ప్రాంతీయ, అంతర్జాతీయ, ద్వైపాక్షిక అంశాల్లో భారత దృక్పథాన్ని మోదీ పర్యటనలో భాగంగా ఆయా దేశాలు అర్థం చేసుకున్నాయని మురళీధరన్ వెల్లడించారు. వాణిజ్యం, పెట్టుబడులు, సాంకేతికత, రక్షణ రంగ సహకారం, ప్రజల మధ్య సంబంధాలతో పాటు ఆయా దేశాలతో భారత​ సంబంధాలు పెంపొందించడానికి ప్రధాని పర్యటనలు దోహదం చేశాయని చెప్పారు.

"ప్రధాని పర్యటనలు భారతదేశ అభివృద్ధి అజెండాకు దోహదపడ్డాయి. ప్రజల ఆర్థికాభివృద్ధి, శ్రేయస్సు పెంపొందించేందుకు ఉపయోగపడ్డాయి. ఫలితంగా బహుపాక్షిక వేదికల్లో ప్రపంచస్థాయి అజెండాను రూపొందించడంలో భారత్ మరింత సహకారం అందిస్తోంది"

-మురళీధరన్, కేంద్ర విదేశాంగ సహాయ మంత్రి

నేపాల్​ ప్రత్యేకమే

నేపాల్​తో భారత్​కు ఉన్న సంబంధాలు ఎంతో ప్రత్యేకమైనవని మరో ప్రశ్నకు సమాధానంగా పేర్కొన్నారు. చరిత్ర, భౌగోళిక పరిస్థితులు, సంస్కృతి, ప్రజల మధ్య సన్నిహిత సంబంధాలు, భద్రత వంటి అంశాల్లో ఇరుదేశాల మధ్య సన్నిహిత సంబంధాలు ఉన్నాయని అన్నారు.

కొన్నేళ్లుగా చైనాతో నేపాల్ చేసుకుంటున్న ఒప్పందాలపై ప్రభుత్వానికి అవగాహన ఉందా అని సభ్యులు ప్రశ్నించారు. అయితే మూడో దేశంతో సంబంధం లేకుండా ఇరుదేశాల మధ్య మంచి భాగస్వామ్యం ఉందని స్పష్టం చేశారు.

"నేపాల్ అంతర్జాతీయ వర్తకంలో మూడింట రెండొంతులు భారత్​తోనే జరుగుతోంది. మూడో దేశం నుంచి నేపాల్​కు వచ్చే ఎగుమతులు దిగుమతుల్లో 90 శాతం భారత్ ద్వారానే వస్తోంది. భారత్-నేపాల్ మధ్య సంబంధాలు సొంత గుణాలపైనే ఆధారపడి ఉన్నాయి. మూడో దేశంతో నేపాల్ సాగిస్తున్న సంబంధాల నుంచి స్వతంత్రంగా ఉన్నాయి."

-మురళీధరన్, కేంద్ర విదేశాంగ సహాయ మంత్రి

భారత్​లోని లిపులేఖ్, కాలాపానీ, లింపియాధురా ప్రాంతాలను తమ భూభాగంలో కలుపుతూ నేపాల్ కొత్త రాజకీయ పటాన్ని రూపొందించిన తర్వాత ఇరుదేశాల మధ్య స్వల్ప వివాదం తలెత్తింది. ఈ ప్రాంతాలు భారత్​కు చెందినవేనని కేంద్రం స్పష్టం చేసింది.