'టెక్​ శక్తితో రైతులు, యువత జీవితాల్లో నవోదయం'

భారతీయ రైతులు, యువత జీవితాలను మార్చే విధంగా సాంకేతికత శక్తిని సద్వినియోగం చేసుకోవడంపై ప్రధానమంత్రి నరేంద్ర మోదీ, గూగుల్​ సీఈఓ సుందర్​ పిచాయ్​ సోమవారం చర్చలు జరిపారు. వీడియో కాన్ఫరెన్స్​ ద్వారా జరిగిన ఈ భేటీలో డేటా భద్రతకున్న ప్రాముఖ్యం సహా ఇతర విషయాలపై పిచాయ్​తో సంభాషించినట్టు మోదీ ట్వీట్​ చేశారు.

గూగుల్​ సీఈఓ సుందర్​ పిచాయ్​తో ప్రధానమంత్రి నరేంద్ర మోదీ సోమవారం చర్చలు జరిపారు. వీడియో కాన్ఫరెన్స్​ ద్వారా జరిగిన ఈ సమావేశంలో.. రైతులు, యువత జీవితాలపై సాంకేతికత ప్రభావం, డేటా భద్రతకున్న ప్రాముఖ్యం వంటి అంశాలను చర్చించారు. ఈ మేరకు ప్రధాని మోదీ ట్విట్టర్​ ద్వారా వెల్లడించారు.

"ఈ రోజు ఉదయం.. సుందర్​ పిచాయ్​తో ఎంతో ఫలప్రదమైన చర్చలు జరిపాను. వివిధ అంశాలపై మాట్లాడుకున్నాం. ముఖ్యంగా.. భారత రైతులు, యువత, పారిశ్రామికవేత్తల జీవితాలను మార్చే విధంగా సాంకేతికత శక్తిని సద్వినియోగం చేసుకోవడంపై చర్చించాం."

--- నరేంద్ర మోదీ, ప్రధానమంత్రి.

కరోనా సంక్షోభంతో పని తీరులో వస్తున్న మార్పులపైనా ఇరువురు చర్చించినట్టు వెల్లడించారు మోదీ. సంక్షోభంతో క్రీడలు సహా ఇతర రంగాలు ఎదుర్కొంటున్న సవాళ్లను కూడా ప్రస్తావించినట్టు పేర్కొన్నారు.

వివిధ రంగాల అభివృద్ధికి గూగుల్​ చేస్తున్న కృషిని మోదీ ప్రశంసించారు. విద్య, డిజిటల్​ ఇండియా, డిజిటల్​ లావాదేవీల గురించి తెలుసుకోవడం ఎంతో ఆనందంగా ఉందన్నారు.

ఇదీ చూడండి:-డిజిటల్​ ఇండియా కోసం గూగుల్​ రూ.75వేల కోట్ల నిధి