శభాష్​ మిత్రమా : వైకల్యాన్ని వీడి.. జెండాగా మారి!

గణతంత్ర దినోత్సం సందర్భంగా ఓ దివ్యాంగుడు చేసిన ప్రయత్నం అందరిచేత శభాష్​ అనిపిస్తోంది. తనకు కాళ్లు లేవని తెలిసినా.. వైకల్యాన్ని సైతం లెక్కచేయకుండా శరీరంపై జాతీయజెండా ప్రతిమ ఉన్న చొక్కా ధరించి.. జెండా కర్ర చివరి వరకు ఎక్కి మువ్వన్నెల జెండా రెపరెపలాడుతున్నట్లుగా వేలాడాడు. ఈ యువకుడు చేసిన అద్భుత సాహసాన్ని ప్రముఖ పారిశ్రామికవేత్త ఆనంద్​ మహీంద్రా ట్విట్టర్​ వేదికగా కొనియాడారు.

గణతంత్ర దినోత్సవం నాడు దేశవ్యాప్తంగా త్రివర్ణ పతాకాలు రెపరెపలాడాయి. దిల్లీ నుంచి గల్లీ వరకు జాతీయ జెండాలను ఎగురవేసి భారతీయులంతా దేశభక్తిని చాటుకున్నారు. అయితే జెండా పండుగ కోసం తానే మువ్వన్నెల జెండాగా మారాడు ఓ యువకుడు. వైకల్యాన్ని కూడా లెక్కచేయకుండా ఆయన చేసిన అద్భుతానికి యావత్‌ దేశం సలాం అంటోంది.

'వాట్సాప్‌ వండర్‌బాక్స్‌' పేరుతో అనేక స్ఫూర్తిమంతమైన, సృజనాత్మక వీడియోలు పోస్ట్‌ చేసే ప్రముఖ పారిశ్రామిక వేత్త ఆనంద్‌ మహీంద్రా సోమవారం ఉదయం కూడా ఓ వీడియోను తన ట్విటర్‌ ఖాతాలో షేర్‌ చేశారు. అందులో రెండు కాళ్లు లేని ఓ దివ్యాంగుడు జాతీయ జెండా రంగులతో ఉన్న చొక్కా ధరించి జెండా కర్రను సునాయసంగా ఎక్కాడు. కర్ర చివరి వరకు వెళ్లి జెండా రెపరెపలాడుతున్నట్లుగా వేలాడాడు. ఎందరికో స్ఫూర్తి కలిగిస్తున్న ఈ వీడియోను మీరూ చూసేయ్యండి...

ఈ వీడియో షేర్‌ చేసిన ఆనంద్‌ మహీంద్రా.. ‘నిన్ననే ఈ పోస్ట్‌ చేయాల్సింది. కానీ ఈరోజు ఉదయమే నాకు ఈ వీడియో వచ్చింది. అయితేనేం స్ఫూర్తినిచ్చే వాటిని చూసేందుకు.. గొప్ప గొప్ప పనులు చేసేందుకు పెద్ద మనసు ఉండాలని గుర్తు చేసుకునేందుకు మనం ఎప్పుడూ ఆలస్యం చేయకూడదు’ అని పేర్కొన్నారు. ఈ వీడియో ప్రస్తుతం వైరల్‌గా మారింది. ‘జీవిత పాఠాన్ని నేర్చుకున్నాం.. మనసుంటే మార్గముంటుంది’ అని పలువురు నెటిజన్లు ప్రశంసలు కురిపిస్తున్నారు.

ఇదీ చూడండి : అర కేజీ వెంట్రుకలను ఆరగించేసింది-ఎందుకో తెలుసా!