న్యాయవ్యవస్థపై అనుచిత వ్యాఖ్యలు చేసిన కేసులో సుప్రీంకోర్టు తీర్పును అనుసరించి సీనియర్ న్యాయవాది ప్రశాంత్ భూషణ్ రూ.1 జరిమానా కట్టారు. అయితే, తీర్పుపై సమీక్ష పిటిషన్ వేస్తానని స్పష్టంచేశారు. జరిమానా కట్టినంత మాత్రాన తీర్పును అంగీకరించినట్లు కాదని వ్యాఖ్యానించారు.
జరిమానా కట్టిన తర్వాత సోమవారం మీడియాతో మాట్లాడారు భూషణ్. దిల్లీలో పౌరసత్వ చట్టం వ్యతిరేక అల్లర్లలో అరెస్టులు, అభియోగాల నమోదుపై కేంద్రంపై విమర్శలు చేశారు.
"సీఏఏ అల్లర్ల కేసులో జేఎన్‌యూ విద్యార్థి ఉమర్ ఖలీద్‌ను పోలీసులు అరెస్ట్ చేశారు. సీపీఎం నేత సీతారం ఏచూరి, యోగేంద్ర యాదవ్, జయతి ఘోష్, ఆపూర్వానంద్ పేర్లను ఛార్జ్‌షీట్‌లో చేర్చారు. విమర్శించే వాళ్ల నోళ్లు నొక్కేయడానికి ప్రభుత్వం అన్ని రకాల వ్యూహాలను ప్రయోగిస్తోంది. దర్యాప్తు పేరుతో శాంతియుతంగా నిరసన తెలిపినవారిపై పోలీసులు కుట్ర చేస్తున్నారు."
-ప్రశాంత్ భూషణ్