మాజీ ఉపముఖ్యమంత్రి సహాయకుడి ఆత్మహత్య

కర్ణాటక మాజీ ఉపముఖ్యమంత్రి పరమేశ్వర సహాయకుడు రమేశ్ ఆత్మహత్యకు పాల్పడ్డారు. బెంగళూరులోని తన నివాసానికి దగ్గర్లోని మైదానంలో చెట్టుకు ఉరివేసుకున్నట్లు పోలీసులు తెలిపారు. పరమేశ్వరపై ఐటీ దాడులలో భాగంగా రమేశ్​ను కూడా అధికారులు విచారించారు. ఆ ఒత్తిడి కారణంగానే ఆత్మహత్య చేసుకున్నట్లు పలువురు అనుమానిస్తున్నారు.

కర్ణాటక మాజీ ఉప ముఖ్యమంత్రి జి.పరమేశ్వరకు ఐటీ ఉచ్చు బిగుసుకుంటున్న వేళ అతడి సహాయకుడి ఆత్మహత్య కలకలం రేపింది. రమేశ్​... బెంగళూరులోని తన నివాసానికి దగ్గర్లోని మైదానంలో ఓ చెట్టుకు ఉరివేసుకొని ఆత్మహత్య చేసుకున్నట్లు పోలీసులు తెలిపారు.
పరమేశ్వరపై ఐటీ దాడులలో భాగంగా ఇటీవలే రమేశ్ ఇంట్లోనూ సోదాలు నిర్వహించారు. అతడ్ని ప్రశ్నించారు. ఈ ఒత్తిడి భరించలేకే రమేశ్​ ఆత్మహత్య చేసుకున్నాడని కర్ణాటక కాంగ్రెస్ నేతలు ఆరోపిస్తున్నారు.

రమేశ్ మృతిపై మాజీ ఉపముఖ్యమంత్రి పరమేశ్వర స్పందించారు. "అతడు ఎందుకు ఆత్మహత్యకు పాల్పడ్డాడో తెలియదు. ఈరోజు ఉదయం కూడా మాట్లాడాను. ధైర్యంగా ఉండాలని సూచించాను" అని చెప్పారు.

కర్ణాటక రాంనగర్​లోని మెల్లెహళ్లికి చెందిన రమేశ్ కాంగ్రెస్ పార్టీ కార్యాలయంలో టైపిస్ట్​గా చేరారు. స్వల్ప కాలంలోనే పరమేశ్వరకు అత్యంత ఆప్తుడయ్యారు.