ఆధార్ చట్ట సవరణపై విపక్షాల విమర్శలు

బ్యాంక్​ ఖాతాలు, మొబైల్​ నంబర్లకు ఆధార్​ అనుసంధానానికి చట్టబద్ధత కల్పించే ఆధార్​ చట్ట సవరణపై లోక్​సభలో చర్చ జరిగింది. ఈ సందర్భంగా విపక్షాలు ప్రభుత్వ చర్యను తప్పుబట్టాయి. ఆధార్​ సవరణ బిల్లుకు అనుసరిస్తున్న ప్రక్రియను వ్యతిరేకించారు లోక్​సభలో కాంగ్రెస్​ పక్ష నేత అధిర్​ రంజన్​ చౌదరి.

లోక్​సభ సమావేశాల్లో భాగంగా సభ ముందుకు ఆధార్​ చట్ట సవరణ బిల్లును తీసుకొచ్చింది ప్రభుత్వం. బ్యాంక్​ ఖాతాలు, ఫోన్​ నంబర్లకు ఆధార్​ అనుసంధానానికి చట్టబద్ధత కల్పించేందుకు చేపట్టిన సవరణలను తప్పుబట్టాయి విపక్షాలు. గతంలో తీసుకొచ్చిన ఆర్డినెన్స్​ను చట్టం చేసేందుకు ప్రభుత్వం యోచిస్తోందని విమర్శించారు లోక్​సభలో కాంగ్రెస్ పక్ష నేత అధిర్​ రంజన్​ చౌదరి. ఎలాంటి కారణం తెలపకుండానే చట్టం చేసేందుకు చర్యలు చేపట్టిందని ఆరోపించారు.

"నేను ఈ ఆర్డినెన్స్​పై జరిగిన ప్రచారాన్ని పలు సందర్భాల్లో తీవ్రంగా వ్యతిరేకించాను. ఈ సభ విధివిధానాలు చూసినా, కార్యచరణ జాబితా చూసినా... ఈ సర్కారు ఆధార్ ఆర్డినెన్స్​ను కారణం లేకుండా ఎలా దుర్వినియోగం చేసిందో మీకే తెలుస్తుంది."

- అధిర్​ రంజన్​ చౌదరి, లోక్​సభలో కాంగ్రెస్​ పక్ష నేత

ఎన్డీఏ ప్రభుత్వం ఆధార్​కు చట్టబద్ధత కల్పించిందని న్యాయశాఖ మంత్రి రవిశంకర్​ ప్రసాద్​ చెప్పిన అంశాన్ని తప్పుబట్టారు చౌదరి. యూపీఏ ప్రభుత్వమే చట్టం తీసుకొచ్చిందన్నారు. మీరు మా నుండి ఆధార్​ అంశాన్ని అప్పుగా తీసుకున్నారని ఎద్దేవా చేశారు. ఆధార్​ సమాచార గోప్యతను ఎన్డీఏ ప్రభుత్వం ఉల్లంఘిస్తోందని గతంలోనే సుప్రీంకోర్టు మొట్టికాయలు వేసిందని గుర్తు చేశారు చౌదరి.

వారి హయాంలో ఆధార్​ నిరాధారం

కేంద్ర న్యాయశాఖ మంత్రి సమాధానమిస్తూ ఆధార్​కు గత యూపీఏ ప్రభుత్వం ఎలాంటి చట్టబద్ధత కల్పించలేదన్నారు. వారి హయాంలో ఆధార్​ నిరాధారంగా ఉందన్నారు. భాజపా సర్కారు దాన్ని చట్టంగా మారుస్తోందని పేర్కొన్నారు.

ఇదీ చూడండి: పరువు నష్టం కేసులతో రాహుల్​ బిజీబిజీ