సర్కారీ ఉద్యోగం ఏదైనా ఇకపై ఒకటే పరీక్ష!

కేంద్రప్రభుత్వ ఉద్యోగం ఏదైనా ఒకే పరీక్ష ద్వారా అభ్యర్థుల్ని ఎంపిక చేసే విధానం అమలుపై ఎన్డీఏ సర్కార్​ కసరత్తు చేస్తోంది. నియామక ప్రక్రియ ముసాయిదా వివరాలను సిబ్బంది వ్యవహారాల మంత్రిత్వ శాఖ వెల్లడించింది.

ప్రభుత్వ ఉద్యోగం కోసం వివిధ పరీక్షలు రాసే అభ్యర్థులకు కేంద్రం తీపి కబురు అందించింది. ఒకే ఏజెన్సీ ద్వారా ప్రభుత్వ రంగ సంస్థల ఉద్యోగుల నియామకం చేపట్టేందుకు కసరత్తు చేస్తున్నట్లు ప్రకటించింది.

కామన్​ ఎలిజిబిలిటీ టెస్ట్ ద్వారా గ్రూప్​-బి, గ్రూప్-సి ఉద్యోగాలను భర్తీ చేయాలని భావిస్తున్నట్లు సిబ్బంది వ్యవహారాల మంత్రిత్వ శాఖ స్పష్టం చేసింది.

"గ్రూప్​-బి, నాన్​ గెజిటెడ్​ పోస్టులతో పాటు గ్రుప్​-బి గెజిటెడ్ పోస్టులు, గ్రూప్-సి పోస్టులకు కామన్ ఎలిజిబిలిటీ టెస్ట్​ ద్వారా అభ్యర్థుల ఎంపిక చేసే విధంగా ఒక ప్రత్యేక ఏజెన్సీ ఏర్పాటు చేయడానికి ప్రతిపాదనలను పరిశీలిస్తున్నాం."
-సిబ్బంది వ్యవహారాల మంత్రిత్వ శాఖ

గ్రూప్​-బి, సి లతో పాటు వాటికి సమానమైన ఖాళీలను సైతం ప్రత్యేక ఏజెన్సీ ద్వారా కంప్యూటర్ ఆధారిత పరీక్ష నిర్వహించి భర్తీ చేయనున్నట్లు ప్రకటించింది కేంద్రం.

ఇదీ పరీక్ష విధానం..

ప్రస్తుతం ఐబీపీఎస్​, ఆర్​ఆర్​బీ, ఎస్​ఎస్​సీ నిర్వహిస్తున్న పరీక్షలకు... కామన్​ ఎలిజిబిలిటీ టెస్ట్​లో విద్యార్హత ఆధారంగా పరీక్షలు నిర్వహించనున్నారు. గ్రాడ్యుయేషన్, ఇంటర్మీడియెట్(12వ తరగతి), పదో తరగతి విద్యార్హత కలిగిన అభ్యర్థులకు వేర్వేరుగా పరీక్షలు నిర్వహించే అవకాశం ఉంది.
పరీక్షలో వచ్చిన మార్కులను అభ్యర్థులకు తెలియజేస్తారు. ఈ మార్కులను ఆయా ఏజెన్సీ(ఐబీపీఎస్, ఆర్​ఆర్​బీ, ఎస్​ఎస్​సీ)లకు అందిస్తారు.

మార్కులు మెరుగుపర్చుకోవడానికి ప్రతి అభ్యర్థికి మరో రెండు అవకాశాలు ఇస్తారు. వీటన్నింటిలో ఎక్కువ ఎందులో ఎక్కువ మార్కులు వస్తే వాటినే తుది ఫలితంగా పరిగణిస్తారు. ఈ మార్కులు మూడేళ్ల వరకు చెల్లుబాటు అయ్యేలా ప్రతిపాదనలు చేస్తున్నట్లు మంత్రిత్వ శాఖ తెలిపింది.

తుది ఎంపిక మాత్రం ఆయా ఏజెన్సీ(ఐబీపీఎస్​, ఆర్​ఆర్​బీ)లు ప్రత్యేకంగా నిర్వహించే పరీక్షల ద్వారా ఉంటుంది.

రాష్ట్ర ప్రభుత్వ ఉద్యోగాల భర్తీకి సైతం ఈ కామన్ ఎలిజిబిలిటీ టెస్ట్ ఫలితాలు ఆధారంగా చేసుకోవచ్చని కేంద్రం స్పష్టం చేసింది. దీని ద్వారా భర్తీ ప్రక్రియలో జరుగుతున్న జాప్యాన్ని తగ్గించవచ్చని పేర్కొంది.

6.8లక్షల ఖాళీ ఉద్యోగాలు

ప్రభుత్వ గణాంకాల ప్రకారం కేంద్ర ప్రభుత్వ శాఖలలో 6,83,823 ఉద్యోగాలు ఖాళీగా ఉన్నాయి. ఇందులో 5,74,289 గ్రూప్​-సి పోస్టులు కాగా... 89,638 పోస్టులు గ్రూప్​-బీలో ఖాళీగా ఉన్నాయి. గ్రూప్​-ఎ కేటగిరీలో 19,896 పోస్టులు భర్తీ చేయాల్సి ఉంది.

అభ్యర్థులకు మేలు

ఇప్పటివరకు ప్రభుత్వ ఉద్యోగాలకు పోటీ పడే అభ్యర్థులు వివిధ పరీక్షలకు హాజరుకావాల్సిన పరిస్థితి నెలకొంది. ఒక్కో ఉద్యోగానికి ఒకటికంటే ఎక్కువ రౌండ్ల పరీక్షలు ఎదుర్కోవాల్సి ఉంటుంది. ఈ ఇబ్బంది కొత్త విధానంతో తగ్గనుంది. అభ్యర్థులు అన్ని పరీక్షలకు దరఖాస్తు రుసుం చెల్లించే బాధ తొలగిపోనుంది.

ఏటా దాదాపు 1.25 లక్షల ఉద్యోగాలకు 2.5కోట్ల మంది పోటీ పడుతున్నట్లు గణాంకాలు స్పష్టం చేస్తున్నాయి.