9 ఏళ్ల నుంచి రూపాయికే రుచికరమైన భోజనం

రూపాయికే కిలో బియ్యం పథకం అందరికీ తెలిసిందే. మరి రూపాయికే రుచికరమైన భోజనం మాట విన్నారా? లేకుంటే ఈ కథనం చూడాల్సిందే.

కర్ణాటక హుబ్బళ్లి నగరం మహావీర్​ వీధిలో ఒక్క రూపాయికే కడుపునిండా భోజనం పెడుతోంది 'రోటీఘర్'​. సర్కారు నుంచి ఎలాంటి సహకారం లేకుండా దాదాపు 9 ఏళ్ల నుంచి కేవలం రూ.1కే భోజనం అందిస్తోంది.

ఈ పని చేస్తోంది ధనవంతులు కాదు. జైన వర్గానికి చెందిన 30 మంది యువకులు కలసి 1998లో 'మహావీర్​ యూత్​ ఫెడరేషన్'​ అనే సంస్థను ప్రారంభించారు. ఆ సంస్థ ఆధ్వర్యంలోనే సేవా కార్యక్రమాలు నిర్వహిస్తున్నారు. ఓ జైన గురువు సలహా మేరకు 2009లో ఈ 'రోటీఘర్'ను ప్రారంభించారు. ​

'ఈ ఆహార కేంద్రాన్ని స్థాపించడానికి కారణం మహావీర్​ జైన సమాజ్ సంస్థే. ఈ సేవా సంస్థకు జైన సమాజం ప్రోత్సాహమిస్తోంది. ఇందులో మొత్తం 30 మంది సభ్యులున్నాం. ఏ కులమనే తేడాలు చూడకుండా అందరికీ మంచి భోజనం అందిస్తున్నాం. సమాజ సంక్షేమం కోసం కృషి చేస్తున్నాం."
-సురేశ్​ జైన్​, మహావీర్​ జైన సమాజ్ సభ్యుడు

రోజూ సుమారు 300 నుంచి 400 మంది ఇక్కడ రూపాయికే భోజనం చేస్తున్నారు.

"ఈ రోటీఘర్​ మొదలై 9 ఏళ్లైంది. రూపాయికే రుచికరమైన భోజనం ఇస్తారు. ఎక్కడ ఉన్నా పిలిచి మరీ భోజనం పెడతారు. వీరిని చూస్తే గర్వంగా అనిపిస్తుంది."
- సిద్ధప్ప, స్థానికుడు

ఒక్క పూట భోజనం తయారు చేయడానికి వీరికి సుమారు 7 నుంచి 8 వేల రూపాయలు ఖర్చు అవుతుంది. రూపాయికే భోజనం పెడతారు కానీ ఉచితంగా అందించడానికి మాత్రం ఇష్టపడరు. ఆ రూపాయిని ఆత్మగౌరవానికి ప్రతీకగా భావిస్తారు.