లాక్​డౌన్​ ఉపశమనం కోసం 'రామాయణం' రీటెలికాస్ట్

దేశంలో కరోనా నియంత్రణ క్రమంలో విధించిన లాక్​డౌన్ వల్ల ప్రజలు ఇళ్లకే పరిమితమై.. కాలం గడవడం కోసం రకరకాల వ్యాపకాలు కోరుకుంటున్నారు. ఈ క్రమంలోనే ప్రజల డిమాండ్​ మేరకు ప్రముఖ పౌరాణిక ధారావాహిక 'రామాయణం' సీరియల్​ను రీటెలికాస్ట్​ చేయనుంది దూరదర్శన్.

దేశవ్యాప్తంగా నెలకొన్న లాక్​డౌన్ కారణంగా ప్రజలకు కాస్త ఉపశమనం కలిగించేందుకు ప్రముఖ పౌరాణిక గాథ 'రామాయణం' సీరియల్​ను రీటెలికాస్ట్​ చేయనుంది దూరదర్శన్​. ప్రజలందరూ ఇళ్లకు పరిమితం కావడం వల్ల కొంత మంది రామానంద్​ సాగర్​ దర్శకత్వం వహించిన 'రామాయణం' సీరియల్​ రీటెలికాస్ట్​ చేయాలనిసామాజిక మాధ్యమాల్లో కోరారు. ఈ నేపథ్యంలోనే ప్రజల కోరిక మేరకు రామాయణాన్ని దూరదర్శన్​లో ప్రసారం చేయనున్నట్లు కేంద్ర మంత్రి​ ప్రకాశ్​ జావడేకర్​ తెలిపారు.

జావడేకర్​ ట్వీట్​

"ప్రజల కోరిక మేరకు ఇలా ప్రకటించడం చాలా సంతోషంగా ఉంది. రేపటి నుంచి రామాయణం రీటెలికాస్ట్​ కానుంది. మార్చి 28 శనివారం నుంచి దూరదర్శన్​ ప్రసార మాధ్యమంలో ఒక ఎపిసోడ్​ను ఉదయం 9 గంటల నుంచి 10 వరకు.. మరో ఎపిసోడ్​ను సాయంత్రం 9 గంటల నుంచి 10 వరకు ప్రసారం చేయనున్నాం."

ప్రకాశ్​ జావడేకర్​, కేంద్ర మంత్రి

జావడేకర్​ ట్వీట్ చేసిన అనంతరం ప్రసార భారతి సీఈఓ స్పందించి.. కేంద్ర మంత్రికి, సీరియల్​ దర్శకుడు సాగర్​కు కృతజ్ఞతలు తెలిపారు. ప్రజల కోరికను నెరవేర్చేందుకు ఈ ధారావాహిక ప్రసారం కోసం డీడీ అధికార యంత్రాంగం యుద్ధ ప్రాతిపదికన పని చేసిందని పేర్కొన్నారు.

దూరదర్శన్​లో తొలిసారి 1987లో రామాయణం ప్రసారమైంది. ఇందులో అరుణ్​ గోవిల్​ రాముడి పాత్ర పోషించగా.. దీపిక చిఖాలియా సీతగా నటించారు.