'ఆర్టికల్ 370' ప్రత్యేక ప్రతిపత్తి కాదు : డోభాల్

జమ్ముకశ్మీర్​కు ప్రత్యేక ప్రతిపత్తి రద్దుపై ఆసక్తికర వ్యాఖ్యలు చేశారు జాతీయ భద్రతా సలహాదారు అజిత్ డోభాల్. ఆర్టికల్ 370 ప్రత్యేక ప్రతిపత్తి కాదని... ప్రత్యేక వివక్ష అని పేర్కొన్నారు. ప్రభుత్వ నిర్ణయాన్ని కశ్మీర్ ప్రజలు అర్థం చేసుకున్నారని వ్యాఖ్యానించారు. అత్యధిక పోలీస్ స్టేషన్ల పరిధిలో ఆంక్షలను ఎత్తేశామని స్పష్టం చేశారు.

కశ్మీర్‌లో మెజారిటీ ప్రజలు ఆర్టికల్‌ 370 రద్దును స్వాగతిస్తున్నారని వ్యాఖ్యానించారు జాతీయ భద్రతా సలహాదారు అజిత్​ డోభాల్. ఆర్టికల్ 370 ప్రత్యేక ప్రతిపత్తి కాదని... ప్రత్యేక వివక్ష అని పేర్కొన్నారు. పాకిస్థాన్ ప్రేరేపిత ఉగ్రవాదాన్ని నియంత్రించేందుకే ప్రభుత్వం ఈ తరహా నిర్ణయం తీసుకుందని.. ఇదే విషయాన్ని కశ్మీరీలు అర్థం చేసుకున్నారని తెలిపారు.

"ఆర్టికల్​ 370 ప్రత్యేక ప్రతిపత్తి కాదు. అది ప్రత్యేక వివక్ష. ఆర్టికల్ రద్దుతో భారతీయులతో సమానంగా కశ్మీరీలను నిలబెట్టాం."

-అజిత్ డోభాల్, జాతీయ భద్రతా సలహాదారు

జమ్ముకశ్మీర్‌లోని మొత్తం 199 పోలీసు స్టేషన్ల పరిధిలో కేవలం 10 చోట్ల మాత్రమే ఆంక్షలు ఉన్నాయని, వంద శాతం ల్యాండ్‌లైన్‌ టెలిఫోన్‌ కనెక్షన్లను పునరుద్ధరించామని తెలిపారు. 92.5 శాతం జమ్ముకశ్మీర్ భూభాగంలో ప్రస్తుతం ఆంక్షలను ఎత్తేశామన్నారు.

జమ్ముకశ్మీర్‌లో పాకిస్థాన్‌ అశాంతిని సృష్టించాలని చూస్తోందని అజిత్‌ డోభాల్‌ విమర్శించారు. 230 మంది పాకిస్థాన్‌ ఉగ్రవాదులను గుర్తించామని వారిలో కొందరు భారత్‌లోకి చొరబడ్డారని.. వారిని అరెస్టు చేశామని తెలిపారు. దాయాది ఉగ్రమూకల నుంచి కశ్మీరీ ప్రజలను కాపాడతామని వ్యాఖ్యానించారు.

అభివృద్ధే కశ్మీరీల లక్ష్యం...

మంచి భవిష్యత్తును, ఆర్థిక అభివృద్ధిని, ఉపాధి అవకాశాలను కశ్మీరీలు కోరుకుంటున్నారని ఉద్ఘాటించారు డోభాల్. కొంతమంది దుండగులు మాత్రమే ఆర్టికల్‌ 370 రద్దును వ్యతిరేకిస్తున్నారని పేర్కొన్నారు. కశ్మీర్​లో శాంతి భద్రతలను ఆ రాష్ట్ర పోలీసులు, పారామిలటరీ బలగాలు పర్యవేక్షిస్తున్నాయని ఇందులో సైన్యానికి పాత్ర లేదని అన్నారు. ఉగ్రవాదులతో మాత్రమే సైన్యం పోరాడుతోందని స్పష్టం చేశారు.

ఇదీ చూడండి:'చంద్రయాన స్వప్నం నెరవేరడం ఖాయం'