దేశంలో రెండు దశాబ్దాలుగా వినియోగంలో ఉన్న ఎలక్ట్రానిక్ ఓటింగ్ యంత్రాలపై ప్రస్తుతం పెద్ద చర్చ జరుగుతోంది. ఈవీఎంలు ట్యాంపరింగ్కు గురయ్యాయని, వాటి స్థానంలో బ్యాలెట్ పత్రాలను ప్రవేశపెట్టాలని ప్రతిపక్షాలు డిమాండ్ చేస్తున్నాయి. ఏ పార్టీకి ఓటు వేశామో తెలుసుకునేలా వీవీప్యాట్లను ప్రవేశపెట్టింది ఈసీ. ఓటు వేసిన అనంతరం కొన్ని సెకన్ల పాటు ఎవరికి ఓటు వేసామో ఈ పరికరంలో చూసుకునే వీలుంటుంది. అయినప్పటికీ బ్యాలెట్ పత్రాలతోనే ఎన్నికలు నిర్వహించాలని డిమాండ్ చేస్తున్నాయి ప్రతిపక్షాలు.
ఆరోపణలకు ఆజ్యం
ఇటీవల భారత అమెరికన్ హ్యాకర్ భారత్లో గత సార్వత్రిక ఎన్నికల్లో ఈవీఎంలు టాంపరింగ్కు గురయ్యాయని సంచలన ప్రకటన చేశారు. అప్పటి నుంచి ఈవీఎంల పనితీరుపై ప్రతిపక్షాల ఆందోళన చేస్తున్నాయి.
బ్యాలెట్ పత్రాలకు వెళ్లేది లేదు: ఈసీ
ఈవీఎంలపై వస్తున్న విమర్శలను భారత ప్రధాన ఎన్నికల అధికారి సునీల్ అరోరా తిప్పికొట్టారు. ఎట్టిపరిస్థితుల్లో బ్యాలెట్ పత్రాలకు వెళ్లేది లేదని తేల్చిచెప్పారు. ఈవీఎంలు అత్యంత పకడ్బందీగా రక్షణ పరికరాల తయారీ సంస్థలు, సాంకేతిక నిపుణునుల బృందం పర్యవేక్షణలో నిర్మించినట్లు గుర్తుచేశారు.
"బ్యాలెట్ పత్రాల కాలానికి తిరిగి వెళ్లేది లేదు. మన దేశంలో ఈవీఎంలు సుమారు రెండు దశాబ్దాల కాలానికి పైగా వినియోగంలో ఉన్నాయి. రాజకీయ పార్టీలు వారి అభిప్రాయాలు, భయాలను తెలియజేయడానికి హక్కు ఉంటుంది. ఎందుకంటే వారు ఓటర్ల తరువాత అతిపెద్ద భాగస్వాములు."
- సునీల్ అరోరా, భారత ప్రధాన ఎన్నికల అధికారి.
ఈసీని కలవనున్న ప్రతిపక్షాలు
ఈవీఎంలపై ప్రజలకు చాలా అనుమానాలున్నాయని, వాటిని ఎన్నికల సంఘం దృష్టికి తీసుకెళతామని కాంగ్రెస్ అధ్యక్షుడు రాహుల్ గాంధీ ప్రకటించారు. 21 విపక్ష పార్టీలతో ఏర్పాటు చేసిన 'సేవ్ ది నేషన్' సమావేశంలో ఆయన మాట్లాడారు. ఈవీఎంలపై నివేదికను సోమవారం సాయంత్రం 5.30 గంటలకు ఎన్నికల సంఘానికి సమర్పించనున్నట్లు తెలిపారు. మరిన్ని సమస్యలనూ ఈసీకి విన్నవిస్తామన్నారు.
ఈసీకి నోటీసులు
వీవీపాట్లను మరింత పారదర్శకంగా, దోషరహితంగా తయారు చేయాలని వచ్చిన పిటిషన్పై బాంబే హైకోర్టు ఎన్నికల సంఘానికి నోటీసులు జారీ చేసింది. తదుపరి విచారణలోపు స్పందించాలని ఆదేశించింది. వీవీపాట్లలో రెండు స్థాయిల్లో ట్యాంపరింగ్కు గురయ్యే అవకాశం ఉందని పిటిషనర్ పేర్కొన్నారు. అప్లికేషన్ సాఫ్ట్వేర్ అప్లోడ్ సమయంలో, రాజకీయ పార్టీల గుర్తులను అప్లోడ్ చేసే సమయంలో ట్యాంపరింగ్కు పాల్పడే అవకాశం ఉన్నట్లు తెలిపారు.
