'ఎన్​పీఆర్​, ఎన్​ఆర్​సీకి ఎలాంటి సంబంధం లేదు'

ఎన్​ఆర్​సీ-ఎన్​పీఆర్​కు ఎలాంటి సంబంధం లేదని స్పష్టం చేశారు కేంద్ర హోంమంత్రి అమిత్​ షా. ఎన్​పీఆర్​ (జాతీయ జనాభా పట్టిక) వివరాలను ఎన్​ఆర్​సీ (జాతీయ పౌర జాబితా)కు ఉపయోగించబోమని హామీ ఇచ్చారు.

జాతీయ పౌర జాబితా (ఎన్​ఆర్​సీ), జాతీయ జనాభా పట్టిక (ఎన్​పీఆర్​)పై దేశవ్యాప్తంగా వ్యక్తమవుతోన్న ఆందోళనలపై కేంద్ర హోంమంత్రి అమిత్​ షా స్పష్టత ఇచ్చారు. ఆ రెండింటికీ అసలు సంబంధమే లేదన్న షా.. ఎన్​పీఆర్​ కోసం సేకరించిన వివరాలను ఎన్​ఆర్​సీ కోసం వినియోగించమన్నారు.

"రెండింటి మధ్య ఎంతో వ్యత్యాసం ఉంది. జనాభాను లెక్కించడం కోసమే ఎన్​పీఆర్​. ఇందులో ఉన్న వివరాలపై దేశంలోని ఎన్నో పథకాలు ఆధారపడి ఉంటాయి. ఎన్​ఆర్​సీ పూర్తిగా భిన్నం. మీరు ఈ దేశస్థులేనా అని ఆధారాలు అడిగే ప్రక్రియ ఎన్​ఆర్​సీ. ఎన్​పీఆర్​, ఎన్​ఆర్​సీ మధ్య ఎలాంటి సంబంధం లేదు. ఒక ప్రక్రియ వివరాలను మరో దానికి ఉపయోగించే ప్రసక్తే లేదు. రెండింటికీ వేరువేరు చట్టాలు ఉన్నాయి."
--- అమిత్​ షా, కేంద్ర హోంమంత్రి.

జాతీయ జనాభా పట్టికను అప్​డేట్​ చేసేందుకు కేంద్ర మంత్రివర్గం ఆమోదించిన నేపథ్యంలో అమిత్​ షా ఈ వ్యాఖ్యలు చేశారు. ఈ పద్ధతిని యూపీఏ ప్రభుత్వమే ప్రవేశపెట్టిందని గుర్తుచేశారు. ఈ ప్రక్రియ ఎంతో ఉపయోగకరంగా ఉండటం వల్ల తాము ఎన్​పీఆర్​ను ముందుకు తీసుకెళ్లడానికి నిర్ణయించామన్నారు.

ఎన్​పీఆర్​ను తమ రాష్ట్రాల్లో అమలు చేయకూడదన్న నిర్ణయాన్ని కేరళ, బంగాల్​ ప్రభుత్వాలు సమీక్షించుకోవాలని విజ్ఞప్తి చేశారు షా. ఈ అంశంపై రాజకీయాలు చేయకూడదని సూచించారు. అభివృద్ధి కార్యక్రమాలతో పేదలు లబ్ధి పొందేందుకు ఉపయోగపడే ఈ ప్రక్రియను అన్ని రాష్ట్రాలు స్వాగతించాలని పిలుపునిచ్చారు.