వైద్య సిబ్బంది భద్రతలో రాజీ పడేది లేదు: మోదీ

వైద్యులు, ఆరోగ్య సిబ్బంది భద్రతకు ప్రభుత్వం కట్టుబడి ఉందని ప్రధాని నరేంద్రమోదీ ఉద్ఘాటించారు. వైద్యుల రక్షణకు జారీ చేసిన ఆర్డినెన్స్ తప్పక​ భరోసా కల్పిస్తుందన్నారు. కొవిడ్-19 సత్వర స్పందన- ఆరోగ్య వ్యవస్థ పాకేజీ కోసం రూ.15 వేల కోట్ల నిధికి కేంద్ర కేబినెట్ ఆమోదం తెలిపింది.

వైద్య, ఆరోగ్య సిబ్బంది భద్రత విషయంలో రాజీ పడేది లేదని ప్రధాని నరేంద్రమోదీ స్పష్టం చేశారు. వైద్య సిబ్బందిపై దాడులు చేసిన వారిని శిక్షించేందుకే ఆర్డినెన్స్​ తీసుకొచ్చినట్లు చెప్పారు.

మన దేశంలోని వైద్య నిపుణుల భద్రతకు ఈ ఆర్డినెన్స్ భరోసా కల్పిస్తుందని మోదీ అన్నారు. కరోనాపై పోరాడుతున్న ప్రతి ఆరోగ్య కార్యకర్త రక్షణకు ప్రభుత్వం కట్టుబడి ఉందన్నారు.

ఏడేళ్ల శిక్ష..

అంటువ్యాధుల సవరణ ఆర్డినెన్స్​-2020కు కేంద్ర కేబినెట్​ బుధవారం ఆమోదం తెలిపింది. వైద్యులు, ఆరోగ్య సిబ్బందిపై దాడులు చేసినా, వారి బాధ్యతలకు ఆటంకం కలిగించినా కఠిన చర్యలు తీసుకుంటారు. నిందితులకు చట్టం ప్రకారం ఆరు నెలల నుంచి 7 ఏళ్ల వరకు శిక్ష పడే అవకాశం ఉంటుంది.

సీఎంలతో భేటీ..

అన్ని రాష్ట్రాల ముఖ్యమంత్రులతో ఈ నెల 27న ప్రధాని మోదీ వీడియో కాన్ఫరెన్స్​ నిర్వహించనున్నారు. దేశంలో కరోనా వైరస్ వ్యాప్తి, లాక్​డౌన్ పరిస్థితులపై చర్చించనున్నారు. లాక్​డౌన్​ విధించినప్పటి నుంచి సీఎంలతో పీఎం వీసీ నిర్వహించడం ఇది మూడోసారి.

ప్యాకేజీకి ఆమోదం..

కొవిడ్- 19 అత్యవసర స్పందన, వైద్య వ్యవస్థ సంసిద్ధత ప్యాకేజీ కింద రూ.15 వేల కోట్ల నిధికి కేంద్ర కేబినెట్ ఆమోదం తెలిపింది. మూడు దశల్లో ఈ నిధిని ఉపయోగించనుంది ప్రభుత్వం.

సత్వర స్పందన కింద రూ.7,774 కోట్లను ఏడాది నుంచి నాలుగేళ్ల కాలం వరకు మధ్యకాలిక అవసరాల కోసం ఖర్చు చేయనున్నారు. అత్యవసర ఔషధాలు, వైద్య పరికరాలు సమీకరణ, జాతీయ, రాష్ట్ర స్థాయిలో అ‌త్యుత్తమ వైద్యవ్యవస్థ ఏర్పాటుకు ఈ నిధిని వెచ్చించనున్నారు.

రాష్ట్రాలకు రూ.3 వేల కోట్లు..

కరోనా తరహా మహమ్మారులపై పరిశోధనకు ఈ మొత్తాన్ని వినియోగిస్తారు. ఇప్పటికే ఈ నిధి కింద రాష్ట్రాలు, కేంద్ర పాలిత ప్రాంతాలకు రూ.3 వేల కోట్లు ఇచ్చారు. ఈ మొత్తాన్ని ఆయా రాష్ట్రాల్లో కరోనా నియంత్రణకు వినియోగించడంపై ఇప్పటికే మార్గదర్శకాలు కూడా విడుదల చేశారు.

ఇదీ చూడండి:ఆరోగ్య సిబ్బంది రక్షణకై కేంద్రం ప్రత్యేక ఆర్డినెన్స్​