కేరళ మళప్పురంలో నది ఒడ్డున ఇసుకలోనే బిడ్డకు జన్మనిచ్చింది ఓ గిరిజన మహిళ.
ముండేరీ వంజ్యంపుళ గిరిజన గ్రామం నుంచి నగరంలోకి వెళ్లేందుకు నదిపై ఉన్న వంతెన 2019 వరదల్లో కొట్టుకుపోయింది. వంతెన పునర్ నిర్మించాలని ఎన్నో సార్లు ప్రభుత్వాన్ని కోరారు అక్కడి ప్రజలు. గ్రామసభలోనూ వారధి కావాలని తీర్మానం చేశారు. కానీ, సంబంధిత అధికారుల నుంచి ఇప్పటి వరకు ఎలాంటి స్పందన లేదు. దీంతో ఆ గ్రామానికి వాహనాల రాకపోకలు ఆగిపోయాయి.
ఆ గ్రామానికి చెందిన 27 ఏళ్ల నిండు గర్భిణి పురిటి నొప్పులతో బాధపడుతోంది. కానీ, వంతెన లేక అంబులెన్స్ నది ఒడ్డు అవతలి పక్క వరకు మాత్రమే చేరుకోగలిగింది. దీంతో అటవీ శాఖ నుంచి ఓ చెక్క తెప్పను అరువు తీసుకుని.. మహిళను ఒడ్డు దాటించారు గ్రామస్థులు.
కానీ, అప్పటికే నొప్పులు తీవ్రమైన గర్భిణి.. నది ఒడ్డునే కూలబడింది. ఆమెతో పాటు వచ్చిన మహిళలు ఓ వస్త్రాన్ని అడ్డుపెట్టారు. గ్రామస్థుల సాయంతో ఇసుకలోనే ఆడశిశువుకు జన్మనిచ్చింది ఆ మహిళ. ఆ తర్వాత అంబులెన్స్లో వచ్చిన వైద్య సిబ్బంది ఆమెకు ప్రాథమిక చికిత్స చేసి.. నిలాంబర్ జిల్లా ఆసుపత్రికి తరలించారు.
ఇదీ చదవండి:చైనా 'షేరిట్'ను తలదన్నే స్వదేశీ యాప్ వచ్చేసింది!