తలాక్ చట్టం​పై సుప్రీం, దిల్లీ కోర్టుల్లో పిటిషన్లు

ముమ్మారు తలాక్​ చట్టాన్ని వ్యతిరేకిస్తూ సుప్రీం కోర్టు, దిల్లీ హైకోర్టుల్లో పిటిషన్​లు దాఖలయ్యాయి. సుప్రీం కోర్టును కేరళకు చెందిన ముస్లిం సంఘం ఆశ్రయించగా... దిల్లీ కోర్టులో ఓ న్యాయవాది వ్యాజ్యం దాఖలు చేశారు. ముస్లిం భర్తల హక్కులను ఈ చట్టం హరింపజేస్తుందని పిటిషన్​లలో పేర్కొన్నారు.

ముమ్మారు తలాక్ చట్టానికి వ్యతిరేకంగా సుప్రీం కోర్టు, దిల్లీ హై కోర్టుల్లో పిటిషన్​లు దాఖలయ్యాయి. 'ముస్లిం మహిళా(వివాహ సంరక్షణ హక్కు) చట్టం 2019' ముస్లిం భర్తల ప్రాథమిక హక్కులను హరించే విధంగా ఉందని ఈ రెండు పిటిషన్​లు పేర్కొన్నాయి.

చట్టంలోని నిబంధనలపై అభ్యంతరం వ్యక్తం చేస్తూ కేరళకు చెందిన ఓ ముస్లిం సంఘం అత్యున్నత న్యాయస్థానంలో వ్యాజ్యం దాఖలు చేసింది. కొత్త చట్టం ప్రకారం ట్రిపుల్​ తలాక్​ చెప్పిన భర్తకు మూడేళ్ల జైలు శిక్షపడుతుంది. ఇలా జరిగితే... భార్య, భర్తలు మనసు మార్చుకునేందుకు వీలుండదని పిటిషనర్​ పేర్కొన్నారు.

ట్రిపుల్​ తలాక్​ చట్టానికి వ్యతిరేకంగా ఓ న్యాయవాది దిల్లీ హై కోర్టును ఆశ్రయించారు. వచ్చే వారం ఈ పిటిషన్​పై కోర్టు విచారణ చేపట్టే అవకాశముందని సమాచారం.

హరియాణాలో తొలి కేసు

ముమ్మారు తలాక్ చట్టం అమల్లోకి వచ్చిన అనంతరం తొలి కేసు హరియాణాలోని నుహా జిల్లాలో నమోదైంది. కట్నం ఇవ్వలేదని చరవాణిలో భార్యకు ముమ్మారు తలాక్​ చెప్పాడు భర్త. అనంతరం ఆ భార్య పోలీసులను ఆశ్రయించింది. పోలీసులు భర్తపై కేసు నమోదు చేశారు.

ఇదీ చూడండి: పాత చట్టాల రద్దు బిల్లుకు పార్లమెంటు ఆమోదం