నలుగురు అత్యాచార బాధితుల్లో ఒకరు మైనరే: ఎన్‌సీఆర్‌బీ

నేషనల్ క్రైం రికార్డ్స్ బ్యూరో అత్యాచార కేసుల విషయంలో చేదు నిజాలను బయటపెట్టింది. ‍2018లో దేశవ్యాప్తంగా జరిగిన అత్యాచారాల్లో ప్రతి నలుగురు బాధితుల్లో ఒకరు మైనరేనని స్పష్టం చేసింది. మొత్తం 33 వేల 356 అత్యాచార కేసుల్లో... 28 వేల 540 కేసుల్లో తెలిసిన వారే దారుణానికి పాల్పడ్డారని ఎన్​సీఆర్​బీ తెలిపింది.

‍2018లో దేశవ్యాప్తంగా జరిగిన అత్యాచారాల్లో ప్రతి నలుగురు బాధితుల్లో ఒకరు మైనరేనని 'నేషనల్ క్రైం రికార్డ్స్ బ్యూరో' నివేదిక వెల్లడించింది. 18 నుంచి 30 ఏళ్ల మధ్య వయసున్న మహిళలపైనే 50 శాతానికిపైగా అత్యాచారాలు జరిగాయని ఈ నివేదిక స్పష్టం చేసింది.

బంధువుల చేతిలోనే

అత్యాచార కేసుల్లో దాదాపు 94 శాతం మంది నిందితులు... బాధితుల కుటుంబ సభ్యులు, స్నేహితులు, తెలిసిన వారేనని ఈ నివేదిక వెల్లడించింది. 2017 లో 32 వేల 559 అత్యాచార కేసులు నమోదయ్యాయని ఎన్​సీఆర్​బీ తెలిపింది. కాగా 2018లో ఈ సంఖ్య 33 వేల 356కు చేరుకుందని పేర్కొంది. 2018లో దేశంలో రోజుకు సగటున 89 అత్యాచారాలు జరిగాయని నివేదిక బహిర్గతం చేసింది.

దారుణం

అత్యాచార బాధితుల్లో 72.2 శాతం మంది 18 ఏళ్లు పైబడిన వారు కాగా... 27.8 శాతం మంది 18 ఏళ్లలోపు వారేనని నివేదిక వెల్లడించింది. మధ్యప్రదేశ్‌లో అత్యధికంగా 5 వేల 433, రాజస్థాన్‌లో 4 వేల 335 అత్యాచార కేసులు నమోదయ్యాయి. మొత్తం 33 వేల 356 అత్యాచార కేసుల్లో... 28 వేల 540 కేసుల్లో తెలిసిన వారే దారుణానికి పాల్పడ్డారని ఎన్​సీఆర్​బీ తెలిపింది.

ఇదీ చూడండి: గెజిట్ నోటిఫికేషన్​తో అమల్లోకి వచ్చిన సీఏఏ