ప్రధానమంత్రి నరేంద్ర మోదీ రచించిన 'లెటర్స్ టు మదర్' పుస్తకం జూన్లో విడుదలకానుంది. ప్రముఖ సినీ విశ్లేషకులు భావనా సోమాయా అనువదించిన ఈ పుస్తకానికి కార్పర్కోలిన్స్ పబ్లిషర్గా వ్యవహరిస్తోంది. ఇది ఈ-బుక్ రూపంలో అందుబాటులో ఉండనుంది.
యుక్తవయస్సులో ఉన్నప్పుడు ప్రతి రోజు రాత్రి.. దేవీ మాతకు లేఖలు రాయడం మోదీకి అలవాటు. దేవీ మాతను ప్రధాని అనేకమార్లు 'జగత్ జనని'గా కూడా అభివర్ణించారు. కానీ ఆయనే వాటిని చింపేసి, ఆ కాగితాలకు నిప్పుపెట్టేవారు. అయితే 1986లో తన డైరీలో రాసుకున్న కొన్ని కాగితాలు మాత్రం బయటపడ్డాయి.
"ఇది సాహిత్య రచన కోసం నేను చేసిన ప్రయత్నం కాదు. నా అభిప్రాయాలు, ఆలోచనలు, పరిశీలనలకు ఈ రచనలు అద్ధంపడతాయి. నేను రచయితను కాదు. మనలో చాలా మంది రచయితలు కాదు. కానీ తమలోని భావాలను వ్యక్తపరచాలని అందరికీ ఉంటుంది. ఆ భావాలు ఎక్కువైతే.. కలం కాగితంపైకి వెళ్తుంది. కచ్చితంగా రాయాలని ఏం లేదు. కానీ మనసు, మెదడులో ఏం జరుగుతుందని తెలుసుకోవడానికి ఇవి ఉపయోగపడతాయి."
--- నరేంద్ర మోదీ, ప్రధానమంత్రి
సినీరంగంపై భావనా సోమాయా అనేక పుస్తకాలు రాశారు. ఆమెకు 2017లో పద్మ శ్రీ పురస్కారం లభించింది. మోదీలో ఉన్న భావోద్వేగాలే ఆయన రచనలకు బలం అని భావనా పేర్కొన్నారు.
