మోదీ ఏరియల్​ సర్వేకు దీదీ బ్రేక్​...!

బంగాల్​లో ప్రధానమంత్రి నిర్వహించాలనుకున్న ఫొని తుపాను సమీక్షకు ఆ రాష్ట్ర ప్రభుత్వం సానుకూలంగా స్పందించలేదు. ఒడిశా తరహాలో విహంగ వీక్షణం నిర్వహించాలని ప్రధాని భావించినా బంగాల్​ ముఖ్యమంత్రి మమతా సర్కార్ పచ్చజెండా ఊపలేదు. ఫలితంగా ఆ రాష్ట్రంలో మోదీ పర్యటన రద్దయినట్లు సమాచారం.

బంగాల్​లో ఫొని తుపాను ప్రభావాన్ని స్వయంగా తెలుసుకోవాలన్న ప్రధాని నరేంద్రమోదీ ప్రయత్నాలకు ఆ రాష్ట్ర ప్రభుత్వం మరోమారు అడ్డుకట్ట వేసింది. తుపాను ప్రభావంపై ఒడిశా తరహాలో ప్రధాని సమీక్ష నిర్వహిస్తారని కేంద్రం లిఖిత పూర్వక సమాచారం అందించినప్పటికీ మమతా బెనర్జీ సర్కార్​ నుంచి సానుకూల స్పందన కరవైంది. ప్రధాని పర్యటనపై ఆసక్తి చూపని బంగాల్​ ప్రభుత్వం... ఎన్నికల విధుల్లో అధికారులు తీరిక లేకుండా ఉన్నారని కేంద్రానికి జవాబిచ్చింది. ప్రధాని కార్యాలయం ఈ విషయం వెల్లడించింది.

గతంలో ఇలా...

కొద్దిరోజుల క్రితమే ఫొని వివరాలు తెలుసుకునేందుకు బంగాల్ ముఖ్యమంత్రి మమతా బెనర్జీకి ప్రధాని రెండు సార్లు ఫోన్​ చేశారు. ఈ రెండుసార్లు ముఖ్యమంత్రి ప్రచారంలో ఉన్నారని, ముఖ్యమంత్రే తిరిగి స్పందిస్తారని సమాచారం అందించారు బంగాల్​ అధికారులు. చివరకు ఆ రాష్ట్ర గవర్నర్​ కేసరి నాథ్​ త్రిపాఠీకి ఫోన్ చేసి వివరాలు అడిగి తెలుసుకున్నారు ప్రధాని.