మసూద్​ అంశంపై ఆగని మాటల మంటలు

మసూద్​ అజార్​ను అంతర్జాతీయ ఉగ్రవాదిగా ఐరాస గుర్తించడంపై భాజపా-కాంగ్రెస్​ మధ్య మాటల యుద్ధం కొనసాగుతోంది. ఈ దౌత్య విజయంలో భాగస్వాములైతే రాజకీయంగా నష్టపోతామని విపక్షాల నేతలు భయపడుతున్నారని భాజపా ఆరోపించింది. ఈ విషయంపై హర్షం వ్యక్తం చేసిన కాంగ్రెస్​... ప్రధాని మోదీపై తీవ్ర విమర్శలు చేసింది.

జైషే మహ్మద్​ ఉగ్రసంస్థ వ్యవస్థాపకుడు మసూద్​ అజార్​ను ఐక్యరాజ్యసమితి అంతర్జాతీయ ఉగ్రవాదిగా గుర్తించడంపై భాజపా, కాంగ్రెస్​ నేతల మధ్య మాటల యుద్ధం కొనసాగుతోంది.

ప్రధానమంత్రి నరేంద్ర మోదీ నాయకత్వ పటిమ వల్లే ఈ ఘనత సాధ్యమైందని భాజపా పునరుద్ఘాటించింది. ఈ విషయంలో విపక్షాల తీరును తప్పుపట్టింది. పదేళ్ల శ్రమకు గుర్తింపు లభించినప్పటికీ... ఈ ఘనతను విపక్షాలు చిన్నది చేసి చూస్తున్నాయని ఆరోపించారు కేంద్ర ఆర్థిక శాఖ మంత్రి అరుణ్​ జైట్లీ.

"మసూద్​ అజార్​ను అంతర్జాతీయ ఉగ్రవాదిగా గుర్తించడం దేశానికి, దేశ దౌత్య నీతికి సంబంధించి ఎంతో పెద్ద విజయం. దేశం గెలిచినప్పుడు... భారతీయులు గెలుస్తారు. కానీ ఈ విజయంలో భాగస్వాములైతే రాజకీయంగా నష్టపోతామని విపక్షాలు అనుకుంటున్నాయి."
-- అరుణ్​ జైట్లీ, కేంద్ర ఆర్థిక మంత్రి

సంతోషమే... కానీ

మసూద్​ను అంతర్జాతీయ ఉగ్రవాదిగా గుర్తించాలన్న డిమాండ్​ను కాంగ్రెస్​ 2009లో ప్రారంభించిందని ఆ పార్టీ సీనియర్​ నేత చిదంబరం అన్నారు. పదేళ్ల అనంతరం, ఇప్పుడు ఈ ప్రక్రియ విజయవంతం అవడంపై హర్షం వ్యక్తం చేస్తూనే... ప్రధాని మోదీపై విమర్శలు చేశారు చిదంబరం. మోదీ మళ్లీ ప్రధాని బాధ్యతలు చేపట్టాలని ఇమ్రాన్​ఖాన్​ ఎందుకు ఆశిస్తున్నారని ప్రశ్నించారు.

మోదీ మళ్లీ అధికారంలోకి వస్తే భారత్​- పాక్​ మధ్య శాంతి చర్చలు మెరుగుపడతాయని ఇమ్రాన్​ఖాన్ గత నెలలో అన్నారు. పాకిస్థాన్​ ప్రధాని వ్యాఖ్యలపై అప్పుడే ఘాటుగా స్పందించింది కాంగ్రెస్​. ఇమ్రాన్​తో మోదీ పొత్తు కుదుర్చుకున్నారని పలుమార్లు ఆరోపించింది.

ఇదీ చూడండి:కన్నీరు మిగిల్చిన నదీ స్నానం - 8 మంది మృతి