'మోదీతో సమావేశం భేష్-బంగాల్ పేరుమార్పుపై చర్చ'

ప్రధాని మోదీతో సమావేశం మంచి ఫలితాల్నిచిందన్నారు బంగాల్ సీఎం మమతా బెనర్జీ. రాష్ట్రం పేరు మార్పు అంశం ప్రధానంగా చర్చించినట్లు తెలిపారు. ప్రపంచంలోనే రెండో అతి పెద్ద బొగ్గు గని 'దెబోచా పాచమి' ప్రారంభోత్సవానికి మోదీని ఆహ్వానించినట్లు పేర్కొన్నారు.

ప్రధానమంత్రి నరేంద్ర మోదీతో జరిగిన సమావేశంలో బంగాల్​ పేరు మార్చే అంశంపై చర్చించారు ఆ రాష్ట్ర ముఖ్యమంత్రి మమతా బెనర్జీ. రాష్ట్రం పేరును బంగ్లాగా మార్చాలని ప్రధానికి విన్నవించారు. ఇంతకుముందే తమ రాష్ట్ర శాసనసభలో పేరుమార్పుపై బిల్లును ఆమోదించామని.. కేంద్రం దీనిపై నిర్ణయం తీసుకోవాలని తన సమావేశంలో పేర్కొన్నట్లు తెలిపారు దీదీ. మోదీతో భేటీ మంచి ఫలితాల్నిచ్చిందన్నారు మమత.

"ప్రధానమంత్రితో సమావేశం బాగా జరిగింది. బంగాల్​ పేరును బంగ్లాగా మార్చడంపై బంగాల్​ అసెంబ్లీలో బిల్లును ఆమోదించాం. ఈ అంశమై ప్రధానిని కోరాను. ఆయన చర్యలు తీసుకుంటానని తెలిపారు. మా రాష్ట్రంలో ఉన్న బొగ్గు క్షేత్రం ప్రపంచంలోనే రెండో అతి పెద్దది... బిర్హూమ్​లో ఉన్న బొగ్గు క్షేత్రం దెబోచా పాచమి. ఈ క్షేత్ర ప్రారంభానికి నవరాత్రి పూజలు పూర్తయిన అనంతరం ప్రధాని సమయం ఇవ్వాలని విన్నవించాను. సమావేశంలో ఇదే రెండో అంశం. ఇద్దరం కలిసి ఈ గని కార్యకలాపాలను ప్రారంభిస్తాం."

-మమతా బెనర్జీ, బంగాల్ ముఖ్యమంత్రి

మోదీతో దీదీ సమావేశ చిత్రాలను ట్విట్టర్​లో పోస్ట్ చేసింది ప్రధానమంత్రి కార్యాలయం. ఎన్​ఆర్​సీ అంశంపై ఎలాంటి చర్చ జరగలేదని స్పష్టం చేశారు మమతా. బంగాల్​లో ఎన్​ఆర్​సీ అమలు చేసే ప్రసక్తే లేదని పునరుద్ఘాటించారు.

ఇటీవలి కాలంలో మోదీపై దీదీ తీవ్ర విమర్శలు చేయడం, లోక్​సభ ఎన్నికల సందర్భంగా కోల్​కతా కేంద్రంగా ఏర్పడిన ఘర్షణపూరిత వాతావరణం కారణంగా ఇరు నేతల మధ్య ఇంతకాలం సయోధ్య లేదు. ఈ నేపథ్యంలో బుధవారం ఈ ఇద్దరు నేతలు సమావేశం కావడం రాజకీయ వర్గాల్లో చర్చనీయాంశమైంది.

ఇదీ చూడండి: రైతు పొలంలో కొండ చిలువ పిల్లలు ప్రత్యక్షం