మహారాష్ట్ర వ్యాప్తంగా వరద ప్రభావంతో ప్రజలు తీవ్ర ఇబ్బందులు పడుతున్నారు. ఈ తరుణంలో వారిని పరామర్శించేందుకు వెళ్లిన ఆ రాష్ట్ర జలవనరుల మంత్రి గిరీశ్ మహాజన్ వ్యవహారశైలి చర్చనీయాంశంగా మారింది. వరద బాధితులకు పరామర్శ సందర్భంగా ఆయన సెల్ఫీ వీడియో తీసుకున్నారు. ఈ దృశ్యాలు సామాజిక మాధ్యమాల్లో వైరల్గా మారాయి. రాష్ట్రమంతా వరదలతో అతలాకుతలం అవుతుంటే విహార యాత్రలా.. మంత్రి సెల్ఫీ వీడియో తీసుకుంటున్నారని సామాజిక మాధ్యమాల్లో నెటిజన్లు విమర్శలు గుప్పిస్తున్నారు.
వైరల్: 'వరద బాధితుల సహాయమా-విహారయాత్రా?'
ఇదీ జరిగింది..
వరద ప్రభావిత ప్రాంతాల సందర్శనలో భాగంగా సంగ్లీ, కోల్హాపుర్ జిల్లాలను సందర్శించారు మంత్రి గిరీశ్ మహజన్. బాధితులను పరామర్శించే సందర్భంలో ఓ బోటులో సహచరులతో కలిసి సెల్ఫీ వీడియో దిగారు. ఆ వీడియోలు సామాజిక మాధ్యమాల్లో బయటపడ్డాయి. ఫలితంగా గిరీశ్పై విమర్శలు తీవ్రస్థాయిలో చెలరేగుతున్నాయి.