తమిళనాడు వేలూరు లోక్​సభ ఎన్నిక రద్దు

తమిళనాడులోని వేలూరు లోక్​సభ ఎన్నికను రద్దు చేస్తూ ఎన్నికల సంఘం నిర్ణయం తీసుకుంది. ఇటీవల డీఎంకే అభ్యర్థి నుంచి భారీగా నగదు పట్టుబడింది. వేలూరులో ఎన్నికలు నిలిపివేయాలన్న ఈసీ సిఫార్సుకు రాష్ట్రపతి అంగీకరించారు.

ఏప్రిల్​ 18న జరగాల్సిన తమిళనాడు వేలూరు లోక్​సభ ఎన్నికను ఈసీ రద్దు చేసింది. నియోజకవర్గంలో భారీగా నగదు పట్టుబడింది. ఈ పరిణామంతో ఎన్నికను రద్దు చేయాలని రాష్ట్రపతికి ఈసీ సిఫారసు చేసింది. సమ్మతించిన రామ్​నాథ్​ కోవింద్​ ఎన్నికను రద్దు చేశారు.

మార్చి 30న ఆదాయ పన్ను శాఖ అధికారులు డీఎంకే అభ్యర్థి కతిర్​ ఆనంద్​ సన్నిహితుల ఇళ్లపై దాడులు చేశారు. ఈ దాడుల్లో ఆనంద్​ తండ్రి ఇంట్లో రూ.10.50 లక్షల అనధికారిక నగదును పట్టుకున్నారు. రెండు రోజుల అనంతరం ఆయన మద్దతుదారులకు చెందిన సిమెంటు గోడౌన్​లో రూ.11.53 కోట్లు స్వాధీనం చేసుకున్నారు.

ఏప్రిల్​ 10న ఐటీశాఖ ఇచ్చిన ఫిర్యాదు మేరకు జిల్లా పోలీసులు డీఎంకే అభ్యర్థి కతిర్​ ఆనంద్​, మరో ఇద్దరు పార్టీ కార్యకర్తలపై కేసు నమోదు చేశారు. ఈ పరిణామాలతో ఎన్నికను రద్దు చేయాలని ఈసీ నిర్ణయం తీసుకుంది. ఎన్నికల సంఘం నిర్ణయాన్ని రాష్ట్రపతి అంగీకరించారు.

ఎన్నికల సంఘం తొలుత నిర్ణయించిన షెడ్యూల్​ ప్రకారం ఏప్రిల్​ 18నే తమిళనాడులోని 39 లోక్​సభ స్థానాలకు ఎన్నికలు జరగాలి. కానీ.. వేలూరు స్థానానికి పోలింగ్​ రద్దుతో 38 నియోజకవర్గాల్లోనే ఎన్నికలు జరగనున్నాయి. వీటితో పాటు.. 18 అసెంబ్లీ నియోజకవర్గాలకూ ఉపఎన్నికలు నిర్వహించనున్నారు.