మానవ హక్కుల బిల్లుకు లోక్​సభ ఆమోదం

మానవ హక్కుల చట్ట సవరణ బిల్లుకు లోక్​సభ ఆమోదం తెలిపింది. ఈ కొత్త చట్టం మానవ హక్కులను మరింత సమర్థంగా కాపాడుతుందని కేంద్రం హామీ ఇచ్చింది.

మానవ హక్కుల చట్టం సవరణ బిల్లుకు లోక్​సభ ఆమోదముద్ర వేసింది. ప్రస్తుతం ఉన్న చట్టంలోని కీలక అంశాలను సవరిస్తూ తీసుకొచ్చిన బిల్లుకు విపక్షాలు అభ్యంతరం తెలిపినా సభ అంగీకారం తెలిపింది. ఈ చట్టం మానవ హక్కులను మరింత సమర్థంగా కాపాడుతుందని కేంద్ర హోంశాఖ సహాయ మంత్రి నిత్యానంద్​ రాయ్​ స్పష్టం చేశారు.

బిల్లులోని అంశాలు..

• మానవ హక్కుల కమిషన్​ ఛైర్మన్​ పదవీ కాలాన్ని 5 ఏళ్ల నుంచి మూడేళ్లకు కుదింపు
• కమిషన్​ ఛైర్మన్​గా భారత విశ్రాంత ప్రధాన న్యాయమూర్తితో పాటు సుప్రీం విశ్రాంత న్యాయమూర్తులనూ నియమించవచ్చు.
• రాష్ట్రాల కమిషన్​లోనూ హైకోర్టు న్యాయమూర్తులను నియమించవచ్చు.
• కమిషన్​లో సభ్యుల సంఖ్య పెంపు

ఇప్పుడున్న ఎస్సీ, ఎస్టీ, మహిళా జాతీయ కమిషన్ సభ్యులతో పాటుగా బీసీ, బాలల హక్కుల సంరక్షణ జాతీయ కమిషన్లు, దివ్యాంగుల శాఖ చీఫ్​ కమిషనర్​ కమిషన్​లో భాగస్వాములుగా ఉంటారు.

• పాలన పరమైన అధికారాలతో పాటు ఆర్థికంగా మరింత బలోపేతం

మరో 3 కీలక బిల్లులు

లోక్​సభలో నేడు మరో మూడు కీలక బిల్లులను ప్రవేశపెట్టింది ప్రభుత్వం. సమాచార హక్కు చట్టం సవరణ, పోంజి పథకాలకు చెక్​పెట్టే బిల్లుతో పాటు ట్రాన్స్​జెండర్ల హక్కులను రక్షించే బిల్లులను ఎన్​డీఏ ప్రభుత్వం సభలో ప్రతిపాదించింది.

ఇదీ చూడండి: గవర్నర్​ డెడ్​లైన్​ బేఖాతరు - వీడని ఉత్కంఠ