ఉపసంహరణే లక్ష్యంగా భారత్, చైనా చర్చలు

సరిహద్దుల్లో బలగాల పూర్తి స్థాయి ఉపసంహరణ లక్ష్యంగా భారత్, చైనా మధ్య ఏడో దఫా ఉన్నతస్థాయి సైనిక చర్చలు జరుగుతున్నాయి. ఈ భేటీలో సమస్యాత్మక ప్రాంతాల్లో చైనా దళాలను ముందుగా వెనుదిరిగేలా భారత్​ ఒత్తిడి చేయనుందని సైనిక వర్గాలు తెలిపాయి.

భారత్​, చైనా మధ్య ఏడో దఫా ఉన్నత స్థాయి సైనిక చర్చలు జరుగుతున్నాయి. తూర్పు లద్దాఖ్‌లోని సమస్యాత్మక ప్రాంతాల నుంచి బలగాల ఉపసంహరణ కార్యాచరణ ఖరారు చేసే ఏకైక అజెండాతో ఈ సమావేశం నిర్వహిస్తున్నారు.

తూర్పు లద్దాఖ్​లోని వాస్తవాధీన రేఖ సమీపంలోని చుశూల్​లో ఈ కార్ప్స్ కమాండర్ స్థాయి చర్చలు జరుగుతున్నట్లు సైనిక వర్గాలు తెలిపాయి. భారత్​ తరఫున 14 కార్ప్స్ కమాండర్ లెఫ్టినెంట్ జనరల్ హరీందర్ సింగ్, విదేశాంగ శాఖ సంయుక్త కార్యదర్శి నవీన్ శ్రీవాస్తవ పాల్గొన్నారు.

వ్యూహాలపై నిర్ణయం..

ఇప్పటికే చైనా అధ్యయన బృందం (సీఎస్​జీ)... సైనిక చర్యల్లో భారత్ అనుసరించాల్సిన వ్యూహాన్ని శుక్రవారం ఖరారు చేసింది. ఈ బృందంలో రక్షణ మంత్రి రాజ్​నాథ్ సింగ్, విదేశాంగ మంత్రి జైశంకర్​, ఎన్​ఎస్​ఏ అజిత్ డోభాల్, సీడీఎస్ జనరల్ బిపిన్ రావత్, త్రివిధ దళాధిపతులు సభ్యులుగా ఉన్నారు.

ఇదీ చూడండి:చైనాతో చర్చలకు ముందు అత్యున్నత స్థాయి సమావేశం

సరిహద్దుల్లో ఏప్రిల్‌కు ముందు నాటి పరిస్థితిని పునరుద్ధరించాలని భారత్​ డిమాండ్​ చేయనుందని సైనిక వర్గాలు తెలిపాయి. సమస్యాత్మక ప్రాంతాల్లో చైనా దళాలను ముందుగా వెనుదిరిగేలా ఒత్తిడి చేస్తుందని స్పష్టం చేశాయి. పాంగాంగ్​ సరస్సు శిఖరాలపై బలగాలను వెనుదిరగాలని చైనా డిమాండ్​ చేస్తే భారత్​ గట్టిగా వ్యతిరేకించాలని నిర్ణయించినట్లు తెలుస్తోంది.

ఇదీ చూడండి:చైనా తీరు మారే వరకు.. ఆ శిఖరాలపైనే పాగా!

ఆరో దఫా చర్చల్లో..

ఇరు దేశాల మధ్య సెప్టెంబర్ 21న జరిగిన చర్చల్లో ముఖ్​పరి, రెజాంగ్​లా, మగర్​ హిల్​ వంటి ప్రాంతాలనుంచి వెనక్కు వెళ్లాలని భారత్​ను డిమాండ్ చేసింది చైనా. భారత్​ మాత్రం రెండువైపులా ఒకేసారి ఉపసంహరణ జరగాలని పట్టుబట్టింది.

ఇదీ చూడండి:భారత్​-చైనా ఏకాభిప్రాయం- ఒప్పందాల అమలుకు అంగీకారం!

ఈ చర్చల్లో సరిహద్దులకు అదనపు బలగాలను తరలించకపోవటం, ఏకపక్షంగా యథాతథ స్థితిని మార్చే ప్రయత్నాలకు దూరంగా ఉండటం, ఉద్రిక్తతలు పెంచే విధంగా ఎలాంటి చర్యలకు పూనుకోకపోవటం వంటి అంశాలపై ఇరుదేశాల అధికారులు కీలక నిర్ణయాలను ప్రకటించారు.

5 నెలలు గడిచినా..

ఇరు దేశాల మధ్య ప్రతిష్టంభన మొదలై 5 నెలలు పూర్తయినా ఇప్పటికీ బలగాల ఉపసంహరణ ప్రక్రియ పూర్తి కాలేదు. ఓ వైపు సైనిక, దౌత్య స్థాయి చర్చలు జరుగుతున్నా... తూర్పు లద్దాఖ్​లోని వాస్తవాధీన రేఖ వెంబడి ఇరు దేశాలు లక్ష మంది బలగాలను మోహరించాయి. ఎలాంటి ఉద్రిక్తతలు తలెత్తినా ఎదుర్కొనేందుకు సన్నద్ధంగా ఉన్నాయి.

ఇదీ చూడండి:అధినేతల చర్చలతోనే సరిహద్దు సమస్యకు చెక్​!