ఐఎస్​ఐఎస్​ ఉగ్రవాదికి జీవితఖైదు

కేరళకు చెందిన ఐఎస్​ఐఎస్​ ఉగ్రవాదికి జీవితఖైదు విధించింది జాతీయ దర్యాప్తు సంస్థ (ఎన్​ఐఏ) ప్రత్యేక కోర్టు. 2015లో ఐఎస్​ఐఎస్​లో చేరి, ఇరాక్​లో పలు ఉగ్రకార్యకలాపాలకు పాల్పడినట్లు నేరం రుజువైంది.

కేరళ ఇడుక్కి జిల్లాకు చెందిన సుబహాని హజా మోయినుద్దీన్​కు యావజ్జీవ కారాగార శిక్ష విధించింది జాతీయ దర్యాప్తు సంస్థ(ఎన్​ఐఏ) ప్రత్యేక కోర్టు. అంతర్జాతీయ ఉగ్రవాద సంస్థ ఐఎస్​ఐఎస్​లో చేరి, ఇరాక్​లో ఉగ్రదాడులకు పాల్పడినట్లు అతడిపై నేరం రుజువైంది. ఈ మేరకు శిక్ష విధించినట్లు అధికారులు తెలిపారు. రూ. 2,10,000 జరిమానా కూడా విధించినట్లు వెల్లడించారు.

2015 ఏప్రిల్​లో మోయినుద్దీన్​ ఐఎస్​ఐఎస్ ఉగ్రవాద సంస్థలో చేరినట్లు అభియోగపత్రం దాఖలు చేసింది ఎన్ఐ​ఏ. అదే ఏడాది ఏప్రిల్​- సెప్టెంబరు నెలల మధ్య ఇరాక్​లో పలు ఉగ్ర కార్యకలాపాలకు మోయినుద్దీన్​ పాల్పడినట్లు పేర్కొంది. ​అనంతరం, 2016లో కేంద్ర భద్రతా బలగాలు, రాష్ట్ర పోలీసుల సాయంతో తమిళనాడులో మోయినుద్దీన్​ను అరెస్టు చేసింది ఎన్​ఐఏ. ​

ఇదీ చూడండి:ఎన్​కౌంటర్​ చేయొద్దంటూ ప్లకార్డుతో లొంగిపోయిన గ్యాంగ్​స్టర్