మెలానియాతో కలిసి కేజ్రీవాల్​ అక్కడకు వెళ్లలేరు!

దిల్లీ ముఖ్యమంత్రి అరవింద్​ కేజ్రీవాల్​కు షాక్​ తగిలింది. ఈ నెల 25న మెలానియా ట్రంప్​ దిల్లీ పాఠశాలను సందర్శించిన సమయంలో ఆమె వెంటే ఉండి, తన ప్రభుత్వం ప్రవేశపెట్టిన కొన్ని ప్రత్యేక విధానాలను వివరించాలనుకున్నారు కేజ్రీవాల్. కానీ ఆ కార్యక్రమానికి హాజరయ్యే వారి జాబితా నుంచి ముఖ్యమంత్రి​, ఉపముఖ్యమంత్రి పేర్లను తొలగించినట్లు తెలిసింది.

భారత్​ పర్యటనలో భాగంగా అమెరికా అధ్యక్షుడు డొనాల్డ్​ ట్రంప్​ సతీమణి మెలానియా ట్రంప్​.. ఈ నెల 25న దిల్లీ మోతీ బాఘ్​లోని ప్రభుత్వ పాఠశాలను సందర్శించనున్నారు. అయితే ఈ కార్యక్రమంలో పాల్గొనే ప్రముఖుల జాబితా నుంచి దిల్లీ ముఖ్యమంత్రి అరవింద్​ కేజ్రీవాల్​, ఉపముఖ్యమంత్రి మనీష్​ సిసోడియా పేర్లు తొలగించారన్న వార్తలు చర్చనీయాంశమయ్యాయి.

నిజానికి మెలానియా ట్రంప్​తో పాటు కేజ్రీవాల్​, సిసోడియా కూడా పాఠశాలకు వెళ్లాల్సి ఉంది. ఆ బడి ప్రత్యేకతలతో పాటు ఆమ్​ ఆద్మీ పార్టీ ప్రభుత్వం ప్రవేశపెట్టిన 'హ్యాపీ' పాఠ్య ప్రణాళికను ఆమె​కు వివరించాల్సి ఉంది.

ఈ విషయంపై అమెరికా రాయబార కార్యాలయ ప్రతినిధిని సంప్రదించగా... స్పష్టతనివ్వాలని ఆయన దిల్లీ ప్రభుత్వాన్ని కోరారు. కానీ దిల్లీ ప్రభుత్వం నుంచి ఇంకా ఏ సమాధానం రాలేదు.

ఈ నెల 24వ తేదీ మధ్యాహ్నం.. డొనాల్డ్​ ట్రంప్​ బృందం అహ్మదాబాద్​కు చేరుకోనుంది. అక్కడ రోడ్​ షో, నమస్తే ట్రంప్​ కార్యక్రమంలో పాల్గొన్న అనంతరం కుటుంబ సమేతంగా ఆయన ఆగ్రాలోని తాజ్​మహల్​ను సందర్శిస్తారు. అనంతరం దిల్లీ వెళ్తారు.

ఇదీ చూడండి:-తాజ్​మహల్​కు ట్రంప్​తో మోదీ వెళ్లరట!