ఫోన్​, నెట్​ లేకుండా 20 రోజుల జీవనం ఇలా...

జమ్ముకశ్మీర్​లో దాదాపు 20 రోజులుగా మొబైల్​, అంతర్జాల సేవల నిలిపివేత కొనసాగుతోంది. తమ వారితో మాట్లాడేందుకు చివరి అవకాశంగా తపాలా శాఖపై ఆశలు పెట్టుకున్నారు కశ్మీరీలు. కానీ వారి ఆశ నిరాశే అవుతోంది. గత మూడు రోజులుగా తపాలా సిబ్బంది విధులకు హాజరవుతున్నా ఉత్తరాలను సంబంధిత ప్రదేశాలకు చేరవేయలేకపోతున్నారు.

జమ్ముకశ్మీర్​కు ప్రత్యేక ప్రతిపత్తి కల్పించే అధికరణ 370 రద్దు నేపథ్యంలో కశ్మీర్​ లోయలో ఆంక్షలు విధించింది కేంద్ర ప్రభుత్వం. అంతర్జాల, మొబైల్​ సేవలనూ నిలిపివేసింది. సమాచార వ్యవస్థ స్తంభించిన తరుణంలో కశ్మీరీలు తపాలా శాఖనే నమ్ముకున్నారు. తమవారితో మాట్లాడేందుకు ఉత్తరాలు రాస్తున్నారు. కానీ వారికి నిరాశే ఎదురవుతోంది.

తమ బంధువులతో మాట్లాడలేకపోతున్నామని ఆవేదన వ్యక్తం చేస్తున్నారు అక్కడి ప్రజలు. తమ వారితో సమాచారం పంచుకునేందుకు తపాలా కార్యాలయాల చుట్టూ తిరుగుతున్నట్లు చెబుతున్నారు. కానీ వారి లేఖలు బంధువులకు చేరటం లేదని పేర్కొంటున్నారు.

స్థానికులకే కాదు తపాలా సిబ్బందికీ ఇబ్బందులు తప్పడం లేదు. కశ్మీర్​లోని చాలా ప్రాంతాల్లో మూడు రోజుల క్రితం తపాలా కార్యాలయాలు తెరుచుకున్నాయి. ఉద్యోగులు విధులకు హాజరవుతున్నా... ఆంక్షలతో సరైన రవాణా లేకపోవటం వల్ల ఉత్తరాలను చేరవేయలేకపోతున్నారు.

ఇదీ చూడండి: కశ్మీర్​లో ఆంక్షలకు ప్రెస్​ కౌన్సిల్​ ఆఫ్​ ఇండియా సమర్థన