కడుపునొప్పి అని వెళ్తే 'కండోమ్'​ రాసిచ్చాడు

వైద్యవృత్తికే అవమానకరమైన ఘటన ఇది. కడుపునొప్పి అని ప్రభుత్వాస్పత్రికి వెళ్లిన ఓ మహిళా ఉద్యోగికి చేదు అనుభవం ఎదురైంది. ఔషధాల దుకాణానికి వెళ్లే వరకు తెలియలేదు ఆ కీచక డాక్టర్​ ప్రిస్క్రిప్షన్​లో గర్భనిరోధకం(కండోమ్​) రాశాడని..!

కడుపునొప్పితో బాధపడుతున్న ఓ మహిళా ఉద్యోగి చికిత్స కోసం జులై 23న ఝార్ఖండ్​ ఘాటిశ్లాలోని ఓ ప్రభుత్వ ఆసుపత్రికి వెళ్లింది. పరీక్షలు చేసిన డాక్టర్​ అష్రఫ్​ బాదర్​.. ప్రిస్క్రిప్షన్​ రాసిచ్చాడు. ఆ మందుల చీటీ పట్టుకొని.. మెడికల్​ స్టోర్​కు వెళ్లిందా ఉద్యోగి. ఒక్కసారిగా కంగుతిన్న అక్కడి సిబ్బంది... ప్రిస్క్రిప్షన్​లో కండోమ్​ రాశారని చల్లగా చెప్పారు.

కడుపునొప్పికి ఔషధం.. కండోమ్​ ఇచ్చాడో డాక్టర్​

ఆ ఉద్యోగి నివ్వెరపోయింది. వెంటనే పోలీసులకు ఫిర్యాదు చేసింది. ఈ వ్యవహారంపై దర్యాప్తు చేసేందుకు ఓ మానసిక వైద్యుడు సహా మొత్తం ముగ్గురితో కూడిన ఓ వైద్యబృందాన్ని నియమించారు ఉన్నతాధికారులు. ఝార్ఖండ్​ ముక్తి మోర్చా శాసనసభ్యుడు కునాల్​ సారంగి ఈ ఘటనను అసెంబ్లీలో ప్రస్తావించగా.. పెద్ద గందరగోళమే తలెత్తింది.

జులై 28న కమిటీ విచారణ ప్రారంభించింది. వైద్యుడు రాసిచ్చిన ప్రిస్క్రిప్షన్​ ఫామ్​తో పాటు మెడికల్​ రిజిస్ట్రీని ఆసుపత్రి నుంచి స్వాధీనం చేసుకున్నారు కమిటీ సభ్యులు. దర్యాప్తు వేగవంతం చేశారు.

''మహిళా ఉద్యోగి ఫిర్యాదు మేరకు విచారణ కోసం ఓ వైద్య బృందం ఏర్పాటైంది. త్వరలో నిజానిజాలు తేలుస్తాం.''

- డాక్టర్​. ప్రభాకర్​ కుమార్​ భగత్​, వైద్యబృంద సభ్యుడు

ఈ ఘటన వెనుక పెద్ద కుట్ర దాగుందని ఆరోపించారు డాక్టర్​ అష్రఫ్​. ఇతర వైద్య సిబ్బంది నిర్వాకం అయి ఉంటుందని అనుమానం వ్యక్తం చేశారు.