కశ్మీర్​ ఎన్​​కౌంటర్​లో జైషే టాప్​ కమాండర్​ హతం

జమ్ముకశ్మీర్​ ఎన్​కౌంటర్​లో జైషే మహ్మద్​ ఉగ్రసంస్థకు చెందిన టాప్​ కమాండర్​ మున్నా లాహోరీ అలియాస్​ బిహారీ సహా మరో ఉగ్రవాదిని భద్రత బలగాలు మట్టుబెట్టాయి. భారీగా ఆయుధాలను స్వాధీనం చేసుకున్నాయి.

జమ్ముకశ్మీర్​లోని షోపియాన్​ జిల్లాలో ఎన్​కౌంటర్​ జరిగింది. జైషే మహ్మద్​​ ఉగ్రసంస్థకు చెందిన టాప్​ కమాండర్​ మున్నా లాహోరీని భద్రతా బలగాలు మట్టుబెట్టాయి. ఈ ఘటనలో మరో ఉగ్రవాదీ మరణించాడు.

కశ్మీర్​లో ఎందరో పౌరులను హతమార్చిన లాహోరీ... జైషే ఉగ్రసంస్థకు నియామకాలు చేపట్టేవాడు. బిహారీ పేరుతో పలు ప్రాంతాల్లో ఉగ్ర కార్యకలాపాలను సాగించాడు.

బోన్​బజార్​లో ముష్కరులు తలదాచుకున్నారని పోలీసులకు కచ్చితమైన సమాచారం అందింది. అనంతరం ఆ ప్రాంతంలో శుక్రవారం నిర్బంధ తనిఖీలు చేపట్టాయి భద్రతా దళాలు. ముందే పసిగట్టిన తీవ్రవాదులు కాల్పులకు తెగబడ్డారు. ఉగ్రవాదుల చర్యలను భద్రతా బలగాలు తిప్పికొట్టాయి. శనివారం ఉదయం ఇద్దరు ఉగ్రవాదులను మట్టుబెట్టాయి. ఘటనాస్థలం నుంచి భారీగా ఆయుధాలు, యుద్ధ సామగ్రిని స్వాధీనం చేసుకున్నాయి.